Һахасин маальг гемлә ноолда келһнә сурһуль болв
Хальмг танһчд һахасин маальг гем тархалһн зогсагдв. Баһ Дөрвдә районд африканск һахасин маальг гемлә ноолда келһнә шишлнг сурһуль болв. Ветеринарн церглт йосна органмудла, МЧС-ин, полицин болн талдан чигн церглтслә хамцу керг-үүлдврмүд күцәв. Сурһульд Көтчнрә, Сарпинск, Октябрьск болн Баһ Дөрвдә райодын элчнр орлцв.
Хальдврта гем тархагдх һазрт ахр болзгт специалистнрин баг һарч йовв. Эдн ирнс даруһан ирлцнһү керг-үүлдврмүд күцәв. Энүнә ашар мал ямаран гемәс көлтә үкснь илткгдв, хальдврта гем альдас иржәхнь медгдв. Хальдврта гемәр гемтсн һахасин шинжлтын материал ветеринарн лабораторьт йовулгдв.
Уксн һахасас зәрм дотрын авад, ветеринарн лабораторьт шинжлт кехин төлә йовулв.
Һахасин африканск маальг гемин әәмшгәс көлтә района ветеринарн церглт, МЧС-ин әнгсин көдләчнр чанһ неквртә таалд церглв. Хальдврта гем тархагдсн һазрт көдлхин төлә специалистнрин тавн баг бүрдәгдв. Шишлнг сурһулин йовудт Россельхознадзорин, МЧС-ин, полицин, Роспотребнадзорин болн талдан чигн церглтсин болн ведомствсин элчнр иим гемлә ноолад келһнә хамцу үүлдвр күцәв.
Баһ Дөрвдә района ах малын эмч Михаил Цадаевин келсәр, Ик-Бухс селән Астраханск областьла хам-хоша бәәнә. Баһ Дөрвдә района Волгоградск областьла, Көтчнрә район Ростовск областьла өөрхн. Тенд һаха олар өскнә, Тегәд эн төр ик чинр зүүжәнә. Иим кемд яһж үүлдхнь сурһуль медүлв. Ямаран керг-үүлдвр күцәхин тускар медв.
Танһчин ветеринарн заллтин ахлачин дарук Геннадий Каменский келсәр, һахасин африканск маальг гем тархагдх әәмшгтә цагт ветеринарн церглт, МЧС-ин болн талдан чигн церглтсин элчнр хар болзгт болн сән чинртәһәр хамцу керг-үүлдвр күцәж чадхин медж авгдв. Иим гем тархагдшгон төлә цуг кергтә тоот бәәну аль угай?
Хальмгин ветеринарийн заллтин ахлачин дарук Геннадий Каменский келсәр, сурһулин йовудт дуту-дундс һарв. Тер бийнь энүг сәәнәр үнлж болх. Энүнд орлцсн специалистнр дамшлт хоршав. Мана танһч иим керг-үүлдвр күцәхдән белн. Сүл дәкж һахан маальг гем Деед Яшкуль поселкд хойр жил хооран илткгдсн билә. Тер цагас авн хйор жилдән иим гем тархагджахш.
Шишлнг сурһулин йовудт танһчин ар үзгин дөрвн района церглтсин элчнр һахасин африканск маальг гемлә яһж ноолда кехинь үзүлж, дамшлтан өөдлүлв. Иим сурһуль Хальмгин талдан чигн райодт бас болх.
Бевина Мергн, Очра Сергей
