Үвлин кемд дула өглһнә системин ясврин көдлмш кегджәнә
Зунын цаг олзлад, хальмгин энергетикүд намрин үвлин кемд белдврин көдлмш күцәжәнә. Ода темдглсн зураһар иим көдлмш тавн участкд кегджәнә. Эднә көдлмш жанһрта болн күнд болдгин тускар бидн икәр ухалхшвидн. Белдврин сән көдлмш кехлә үвлин кемд завср угаһар дулан өггдх.
“Северная” нертә котельнд белдврин зәрм көдлмш төгсв гиж слесарьмуд келнә. Ода эдн хамгин ик дааврта көдлмш — дула өглһнә хойр хәәс ясж белдх зөвтә.
Слесарь Николай Ковалек келсәр, ода цуг көдләчнр нурһлж котельня белдврин көдмшт көдлжәнә. Дала көдлмш кегдв, олн-зүсн сольврин әнгс сольгдв, ода шин хәәс тәвх даалһвр бәәнә.
“Энергосервис” нертә акционерн ниицәнә ах инженер Александр Санж-Горяевин келсәр, һурвдгч тойгта участкин медлд хотл балһсна арвдгч болн һурвдгч микрорайодт бәәх дөчн зурһан обьект бәәнә. Эннь әмтн бәәдг һучн гер, арвн зурһан социальн учреждень. Эн жил компань ясврин көдлмшиг эврәннь мөнгәр күцәжәнә. Тер мет талдан регионмудас тосхачнр ирж көдлжәхш.
“Энергосервисин” ах инженер Александр Санж-Горяевин келсәр, эн жил көдлмшин кемжән ниднәкәс ик болжана. Юнгад гихлә, хәәс ясж шинрүлһнә, дула өгдг турвас шинрүлһнә цуг көдлмшиг эврәннь чидләрн кежәнә. Иим кевәр мөнг әрвлжәнә. Әрвлсн мөнгиг шинрүлһнә халхад йовулх санан бәәнә. Тер мет шин оборудовань хулдж авгджана. Дунд эрдмин сурһулин заведеньд һанначнран сурһж авх арһ учрв. Ода котельн оборудованиг эврән ясжана. Цуг һанначин көдлмшиг эврәннь чидләр кех арһ бәәнә гиж ах инженер келнә.
Үвлин кемд мана гермүдт дулан болхин төлә слесарьмуд болн талдан чигн көдләчнр ямаран ик белдврин көдлмш кедгин тускар бидн дотран ухалхшвидн. Тер мет ус химин эв-арһа цеврлһнә лабораторин көдләчнр бас ик чинртә көдлмш күцәнә. Инженер-химик Нина Нимгирован келсәр, хальмгин усн дегд ик давста болад, цуг кемжәнәс давна.
Инженер-химик Нина Нимгирован келсәр, энүнә төлә цуг кергтә реактив белдж авна. Дула өглһнә системд жөөлн усн кергтә болна.
Тегәд чион үвлд котельн белдлһнә көдлмш жанһрта болн күнд болна. Үвл эклтл энергетикүдт күцәх көдлмш дала. Цуг белвдрин көдлмшиг Энергосервисин көдләчнр августын дундурар төгсәх зурата. Белдврин көдлмш сәәнәр кехлә, үвлин кемд котельн завср угаһар көдлж чадх гид специалистнр келнә.
Батан Санжирма, Ирчин Алексей
