Шин жилин өмн өргнд хотл балһснд зөв угаһар олн улс мах хулджахнь үзгднә
Шин жилин өмн өргнд Элст балһсна уульнцд ирлцнһү зөвшәл угаһар олн улс энд-тенд мах хулджахнь үзгднә. Эдн базрин үнәс продукцан кимдәр хулджана. Болв иим хулдачнр мах хулдх зөвшәлин документ угаһар хулдан кежәнә. Тегәд иим мах хулдж авсн әмтн хальдврта гемәр гемтх әәмшг бәәнә.
Эн арһлачнр мана танһчла хам-хоша бәәх Ставропольск крайяс ирәд һахан мах хулджана. Одахн тенд һахасин маальг гем илткгдсн билә. Мах хулдх ветеринарн документ бәәнү аль угай гисн сурврт эдн тодрха цәәлһвр өгч чадсн уга. Эн арһлачин келсәр, гертән өсксн һаха алад махинь хулджана. Эндр зөвшәлин цаас авчсн уга бәәж. Иим документ хальмг танһчд зөв-йосн уга болжана гиж эн келнә.
Энүнә хулджах махн әмтнд әәмшг учрашго гиж әмтнд зуг хоосн үгднь иткнә. Мах болн үснә зүүтә хот-хулджах талдан улс болхла мана сурврт тас хәрү өгсн уга. Россельхознадзорин цәәлһсәр.эднә көдләчнр долан хонг болһн иим улсиг бүрткж хәләнә. Сүл өрәл сард эдн мах кергтә документ угаһар хулджах һурвн йовдл илткв. Хальмг танһчар Россельхознадзорин заллтин әнгин ахлач Санан Очир-Горяевин келсәр, бүртклһнә йовудт илткгдсн һурвн йовдлар Әрәсән заканла ирлцәтәһәр протокл бичгдв. Иим мах хулдшго цаасн арһлачнрт өггдв.
Иим бүртклһнә көдлмш кегдсн бийнь, арһлачнр зөв угаһар мах хулдна. Келхд, бүтрклһнә органмудын күцәсн үүлдвр эднд боомтг болжахш. Талын һазрас ирсн арһлачнр малын эмчин цаас авхар седжәхш. Юнгад гихлә тавн зун арслнг өгхлә эднд амр болна. Йосн кеәвр документ һарһж авхд жанһрта болна гиж эдн тоолжана. Ирина Манджиева кесг жилдән хулд-гүүлгәнә халхар көдлжәнә. Эн күүкд күн санитарн книжк цаглань һарһж авв, һахан мах хулдх зөвшхлин цааста. Тегәд эн арһлач Приютненск районас авч ирсн махан санамр хулджана. Ирина Манджиеван келсәр, мах хулдхин өмн, түрүләд малын эмд одад шишлнг документ һарһж авна. Энүнә хөөн Элст балһснд көдлжәх лабораторьт одх кергтә. Энд махан чинр шинжлгдж хәләгднә. Лабораторь эврә справкан өгнә. Иим цааста болхла мах санамр юмнас әәлго хулдж болх.
Малын эмин цаас авхин төл нег һахан махна төлә эн күүкд күн хойр зун арслнг өгнә. Энүнд деер өдр болһн нәәмдлһнә һурвн зун арслнг өгх кергтә. Тегәд махн үнтәрнә. Зөв угаһар мах худжах улс болхла продукцан невчк кимдәр хулджана. Тер бйинь элстихн һаза кергтә цаасн угаһар хулджах арһлачнрас мах хулдж авна. Эннь әәмшгтә, һнагд гихлә сүл цагт хальдврта гем олар тархагджана. Шишлнг цаасн угаһар мах хулджах әмтн продукцан кимдәр хулджана. Болв әәмшгтә гемәр гемтхин ормд һучн-тәвн арслнг әрвллго, кергтә документ үзүлсн улсас мах хулдж авхла санамр болх.
Азыда Надежда, Бадмаран Владислав
