Селигерин формуд Хальмгин баһчуд орлцв
Тверская областьд "Селигер 201З" нертә цугәрәсән баһчудын форум көдлмшән цааранднь давулжана. Ода һурвдгч селгән болжана. Хальмг танһчас энүнд тавн күн орлцжана. Эдн цугтан Хальмгин государственн университетин оютнр. Хойрдгч селгәнә "Учитель будушего" нертә жисәнә орлцаччнр болхла гер талан хәрж ирв. Хальмгин оютнр баһчудын форумд эврәннь билг-эрдмән үзүлв, шин медрл авв.
“Лето вокруг света” болн “Мир без наркотиков”. Иим нерәдлһтәһәр лагерин хойрдгч селгән болжана. Цаһан Амн селәнә хамгин ке-сәәхн һазрт танһчин цуг райодас далн бичкдүд цуглрв. Тер тоод Арина Шараева болн Анатолий Соловцев.
Анатолий Соловцевин келсәр, иргчдән дәкнәс нааран ирх дурн бәәнә. Энд йир икәр таасгджана. Олн-зүсн наадн болн марһас болна.
Арина Шараеван келсәр, өдр болһн Ижл һолд одад өөмнәвидн. Ода деерән өөмдг дасжана. Олн нәәж олж авч.
Мана үүдәгч баг ирсн кемд көвүд-күүкд эмнүл авчасн бәәж. Зәрмнь физио эмнүлһнд оржасн бәәж, талдан көвүд-күүкд төвкнүн көгжм сонсад галотерапийн авчасн билә. Эмчнрин келсәр, ки давхцдг гем эдгәхин төлә энүнәс гетлүлхзин төлә иим эв-арһ йир олз-туста болна.
Энүнә келсәр, лагерьт цугнь таасгджана. Олн-зүсн наад наадна, телевизор хәләж болна, марһанд орлцна. Шуугатаһар амрчана. Нааран хойрдад иржәнә. Энд таасгджана. Олн нәәжтә болв.
Элст балһсна сурһульч Делгр Хулхачиева энд кесг жилдән амрад, сурһулин шин жилин өмн цогц-махмудан батрулна. Эн саамд эврәннь нәәжнртәһән ирв. Лагерин тускар, энд сул цаган яһж давулжахин, хамдан дуулад, гитар цокад амрсна тускар эднд келж өгсн бәәж.
Делгр Хулхачиеван келсәр, лагерь йир сән. Вожатый бас таасгдв. Өдр болһн соньн керг-үүлдврмүд бүрдәнә. Эндр Хеллоуна өдр. Энд амрхд соньн.
Вожатый энд нег чигн минутд хара суухш. Тегәд чигн көвүд-күүкдт сул цаг һархш. Энд эдн олн-зүсн керг-үүлдврмүд бүрдәж давулна. Олн зүсн медрлин болн спортивн марһас болна. зөв-йосна болн экологическ өдрмүд, лирическ болн төрскнч асхд болн талдан чигн харһлтс бичкдүдт соньн болжана.
“Сюмин булг” лагерин ах вожатый Баатр Олцоновин келсәр, дорас өсж йовх баһчудт төрскнч сурһмж өглһн һол күцл болжана. Кесг дәкж мастер-класс кегдв, бичкдүдт Әрәсән болн Хальмг танһчин тугин болн частрин тускар келж өгнә. Лагерин эргндк аһу цеврлж. Тер мет эн селгән наркотикла ноолда келһнд нерәдгджәнә. Керг-үүлдврт бичкдүд орлцад, әмтәхн белг авв.
Иргч һурвдчг селгәнә һол төрнь этнокультурн зөрүлт. Энүнә йовудт көвүд-күүкд хамльг улсин сойлын болн авг-бәрцин тускар медрл авх, төрскн келәрн күүндж чадх. Кесг жилин туршарт пансионат сән халхасн бийән үзүлв. Бичкдүд лагеряс хәрхләрн уульна. Иргч жилд нааран байртаһар ирж амрна. Энд сурһульчнриг дамшлттат багшнр болн талдан чигн көдләчнр күләжәнә.
«Сюмин булг” пансионатын улд көдлжәх бичкдүдин лагерь мана танһчд хамгин сән гиж тоолгдна. Ижл һолын көвә, эргндк сәәх йиртмж, медрл авдг селгән — цуг эн тоот сергмжтәһәр амрхд сән таал өгнә, цогц-махмудан батрулсн деерән бичкдүд кергтә медрл авчана.
Ээнән Делгр, Бадмаран Владислав
