Төрскән харсгч дәәнә цагт Дорд үзгин Пруссьт немшин лагерьт өнгрсн салдс Михаил Муклиновин элгн-саднь олдв
Төрскән харсгч дәәнә цагт Дорд үзгин Пруссьт немшин бәрәнд әмнәсн хацһсн салдс Михаил Муклиновин элгн-саднь олдв. Энүнә өөрхн элгн-садн күүкд күн Гиляна Мокликова цуг кергтә документар герч кев. Дәкәд нег тодлад келхлә, ноябрин эклцәр Калининградск госархив салсдин элг-садынь олж авхин төлә зарһин приставмудын церглт эрлһ өгсмн. Цергчин зургар болн талдан чигн то-дигәр Михаил Муклинов мана танһчд элгн-садан олж авсн тавдгч салдс болв. Энүнә тускар тодрхаһар мана сюжетд келгджәнә.
Гиляна Мокликован келсәр, төрскән харсгч дәәнә цагт геедсрн хойр көвүнәннь тускар ээжнь келхдән дурго билә. Дәәнә хөөн зуг нег көвүн хәрж ирв. Гилянан аавнь өрк-бүлд ор һанцхн көвүн бәәж. Дәәнә хөөн энүнә тускар эднә өрк-бүлд тас келдго бәәсмн. геедсрн ааван хәәх арһ уга билә. Зуг ода жирн нәәмн жил болад немшин концлагерьт өнгрсн Михаил Мокликовин жирһлин сүл цагин тускар медгдв. лайф Гиляна та нааран ямаран докумень авч ирвт?
Бәрән авгдсн салдснрин лагерьт немшин архивариусин бичсн салдсин нер-уснь, ямаран һазрт бәәршлжәсна туск то-диг чик болж һарв. Гиляна Мокликован авч ирнс салдс Михаил Мокликовин ахнр-дүүнрин зург болн докумертмуд ил герч болв. Энүгәр хәәвр төгсв. Зурһан зун йирн хойрдгч тойгта пехотн полкин нег минһн йисн зун арвн доладгч жилд төрсн салдс Михаил Мокликов Приютненск района Балык селәнд төрж. Дөчн негдгч жилин октябрин арвн негнд немшин бәрәнд авгдв. Нег минһн йисн зун дөчн һурвдгч жилин августын арвн йиснд садв гемәс көлтә немшин лагерьт өнгрж.
Хальмг танһчар Әрәсән зарһин приставмудын федеарльн церглтин заллтин барин цергльин көдләч Делгр Бадгаеван келсәр, мана заллтд Калинингардск госархивас бичг ирв. Бидн эн бичгәр Гиляна өгсн документ йовулвидн. Тенд архивин көдләчнр шинжлт кеһәд, Гиляна Мокликова салдс Михаил Мокликовин элгн-садн гиж илткв.
Хальмг танһчин военкоматын специалистнр эн жилин март сард салдс Михаил Мокликовиг медж йовсн улиг хәәв. Болв тер цагт хәәвр сән ашта болсн уга. Тер цагас зуг хуучн газет үлдж. Болв эн саамд государственн архивин специалистнрин, зарһин приставмудын болн телевиденя көдләчнрин нилчәр немшин лагерьт өнгрсн салдсин нерн медгдв. Эн көдлмш нег долан хонгин эргцд күцәгдв. СНХ Салдс Михаил Мокликовин элгн-садн гиялна Мокликован келсәр, ода Польшт одад, эврәннь аавиннь цогцд мөргх саната. дәәнә цагт зәнг зә уга геедрсн салдс олдснь ик байрта йовдл болв.
Төрскән харсгч дәәнә цагт Дорд үзгин Пруссьт немшин лагерьмудт өнгрсн хөрн долан салдсин нернәс нег нер-усн илткж авгдв. Эн өдрмүдт салдс Михаил Мокликовин өрк-бүлд энүнә элгн-саднь зул өргәд, аавиннь санл тодлх.
