Әрәсәд донормудын туск шин закан һарв
Әрәсән донормуд мөнгнә ормд сән хот-хоолар теткгдхмн. Болв ховр цусан өгсн улс урдк кевәр мөнг авч чаджана. Шин закана тускар ода әмтн зүткәтә күүндвр кежәнә. Хальмг танһчд эн туст әмтн нег мөслгч тоолвр уга.
Шин заканд хамгин ик сольвр донормудыг хотар тетклһнә халхд орулгдв. Цус өгсн әмтн сән хот-хоолар теткгдх зөвтә. Энүнәс иштә шин зака күцәлһнд ик боомтг учражана. Хот-хол түгәж өглһнә туст олн-зүсн төрмүд хаһлх кергтә. Альд, ямаран хот-хоолар донормудыг теткх, кедү мөнгн энүнә төлә һархнь тодрхаһар темдглж авх төр босжана. Донорск цусн дутжах деерән, хот-хоолар теткх төр хаһлх кергтә болжана. Эн туст күнд болн жанһрта бәәдл тогтв гиж медикүд келнә. Эврә дурар донорск жисә делгрлүһнә специалист Баатр Анюшевин келсәр, ода әмтн цусан өнгәр өгх зөвтә. Иим улст сән чинртә хот-хол өгх кергтә. Эн туст шин закан һарв. Болв эн закан ода мана танһчин правительствд бәәнә. Шин закан үүлдврт орхла, бидн әмтнд энүнә тускар зәнглхвидн.
Цус өглһнә шин зака күцәлһнә эв-арһ Хальмг танһчд болн Әрәсән талдан чигн регионмудт күцц белн болад уга. Эн халхар зөв йосна болн материальн-техническ ул уга болжана. Цус өгсн улст мөнгнә ормд хот-хол өгх шин закан мана танһчин улст цусан өгх урмд өгсн уга гиж давсн жилин аш медүлв. Эврә дурар цус өгх улсин то зөвәр баһрв. Ода болхла цусан өгсн әмтн арвн долан арслнга әмтәхн печень авчана, эднд зун арслнг данцалһна мөнгн өггджәнә. Донорск жисәнә специалист Баатр Анюшевин келсәр, ода деерән зун арслнга данцалһан мөнгн тер кевәрн үлдв. Хойр өдр амрч болх. Иим әмтн хамгин түрүн больницд орулгдх. Эмнүлһнә путевк авч чадх. Цуг эн закан ода күртл үүлджәнә.
Ода деерән цусна цутхлнг нег минһн йисн зун йирн нәәмдгч жилд батлж авсн танһчин закаһар көдлжәнә. Шин закан хальмг танһчд үүлдврт орулхин төлә, энүг күцәгч болн зака һарһгч йосна органмудт шинжлж хәләх зөвтә. Хальмг танһчин эрүл-менд харлһна болн социальн делгрлтин министр Владимир Шовуновин келсәр, шин закан федеральн халхар һарв. Ода эрүл-менд харлһна Әрәсән министерств заквр батлж авад, регионмудт буулһж өгх зөвтә. Энүг ирхинь күләжәнәвидн. Заквр ирхлә, танһчин закан һарх.
Донорствин төр зуг медицинск төр болсн деерән, социальн төр болжана. Шин закан Әрәсәд зуг нег сардан үүлджәнә. Болв цусан өгсн улст мөнг өгшго закан олн улсиг үүмлж таасгджахш. Ода донормуд мөнг авхар цус өгнә. Хот-хол эднд керг уга. Зәрм улс цусан өгәд, бийән тежәнә. Шин закан хажһр гиж тоолжана. Донор күн мөнг авх зөвтә. Әмтнә жалвин кемжәнәс иштә мөнг өгх кергтә.
Онц темдглхд, цусан өгсн зәрм улст урдк кеәвр мөнгн өггдхмн. Шин закаһар ховр цус өгсн әмтн мөнг авч чадх. Дәкәд болхла цус өгәд мөнг авчах улс күндтә донорин нер зүүж чадшго.
Бевина Мергн, Настан Сергей
