Әрәсән бичкдүдин хувцнд герл туслдг татасн бәәх зөвтә
Удл уга Әрәсән бичкдүдын болн баһчудын хувцн эрк биш герл туслһна татаста болх зөвтә. Ода Әрәсән Госдумд фликермуд олзлһна туск закана төсв орулгдв. Кемр иим зака батлж авхла, эк-эцкнр эврәннь үрдүдин хувцнд герл туслһна татас наах зөвтә. Эннь бичкдүд зеткртә йовдлмудас гетлүхин төлә күцәгджәнә. Келхд, давсн жилд мана танһчин хаалһд бичкдүд орлцата хөрн негн зеткртә йовдл учрв.
Бичкдүдин болн баһчудын хувцнд герл туслһна татас эс гиж браслет наахин тускар ода сурһульчнр хоорндан күүндж, ухан-тоолврарн хувалцжана. Нәәмдгч классин сурһульч Роберт С-Горяевин келсәр, шин закаг депутатнр батлж авхинь тенкән уга гидгәр күләжәнә. Нәәмдгч классин сурһульч Роберт С-Горяевин келсәр, хаалһд зеткртә йовдлмудын то баһрхмн, иим татасиг эврәннь велосипедтан наах саната.
Эн көвүнлә күүнджәсн кемд, талдан чигн баһчуд күүндврт орлцв. Эдн Робертла әдл бас иим татасиг альд наахан темдгләд авчкв. Эднә тоолврар, иим татасн хойрдгч селгәнд школд оддг сурһульчнрт кергтә. Иим тата сээм деерән наах саната. Тиигхлә сәәхн болх гиж эн көвүн келнә. Талдан көвүнә тоолврар, нурһн деер арднь иим татасн бәәх зөвтә. Ик холас үзгдх. Сөөднь хаалһ керчж һархд күнд, зәрм жолачнр соктуһар йовна.
Нелли Мишкилован келсәр, хаалһд үлү күн уга, күн болһн жолач, эс гиж йовһн күн, тер мет эдн цугтан эк-эцкнр болжана. Үвләр өдр ахр болад, эрт харнһурна. Сурһульчнрин ик зунь школасн асхн ора фонарикин герл олзлад йовх кергтә болна. Хаалһд тас юмн үзгдхш. Герл туслдг татаста болхла, маши залачнр ик холас бичкдүдиг үзх. Нелли Мишкилован келсәр, маши залачнр дегд түргәр гүүлгнә. Иим татас эрк биш көвүндән хулдж авх зурата. Эннь йир сән керг.
Тер саамд ГИББД-н заллтд эн туст статистикин то-диг кев. Харнһу цагт хамгин олн йовһн әмтн әмнәсн хаһцна. Келхд, давсн жилд бичкдүд орцлата хөрн негн зеткртә йовдл учрв. ГИБДД-н әнгин инспектор Игнат Куцековин келсәр, герл тусдг татаста бичкдүдиг жолачнр ик холд үзж чадх. Иим көвүд-күүкдиг маши залачнр үзх һазрин хоорндк аһу күсдундур -һурвн холванд икднә. Тегәд аштнь кү дәвршгон төләд чик шиидвр авхин төлә жолачд немр долан секунд өгнә. Тегхд зеткртә йовдлмдудын то кесг холванд баһрна. Хальмг танһчар ГИБДД-н әнгин инспектор Игнат Куцековин келсәр, асхн —сө хаалһд маши залачнр йовһн күүг зуг хөрн тавн-һучн метрас үзнә. Частан жирн дуунад йовж йовсн маши зогсахд цаг кергтә, зуг нег секунд үлднә, нег үлү, машин тер дарунь дор ормдан зогсхш.
Кемр Әрәсән государственн Думин депутатнр шин зака батлж авхла, школд эс гиж һаза наадхин төлә бичкдүдиг һарһж йовулжаһад, эк-эцкнр көвүд-күүкдин хувцнд герл туслдг татас эрк биш наах зөвтә. Нег үлү иим татасн велосипедар, рликар болн самокатар гүүлгдг бичдкүдт кергтә болх. Иим кеәвр бичкдүд орлцата хаалһст зеткртә йовдлмудын то баһрсн деерән, көвүд-күүкд хаалһд саг бәәж, болһамжтаһар йовхд сән даслт болхмн.
Ээнән Ольга, Бадмаран Владислав
