Танһчин номтнр өөдән ачлврмуд авв
Элст балһснд Әрәсән номин сән өдрт нерәдгдсн байрин хург болв. Энүнд КИГИ РАН-на, Хальмгин университетин болн аридн аһу шинжлһнә институтын нидн жилин көдлмшин аш диглгдв. Энүнә йовудт олн-зүсн халхар сән күцәмж бәрсн номтнр ачлгдв. Теднә тоод экономическ номин доктор Наталья Курепина.
Наталья Курепина эврәннь түрүн номин көдлмшән нег минһн йисн зун найн йисдгч жилд бичсмн. Энүг Хальмг АССР-ин һазр үнлһнә ашт нерәдв. Бичкн дегтр бичхин төлә арвн жилдән шинжлтын көдлмш кев. Түрүләд Хальмгин государственн университет төгсәснә хөөн, дарунь Волгоградск селәнә эдл-ахун институт чиләһәд, Южгипроземин шинжлтын институтд эгл специалист болж көдлв. Номин шинжлт кехдән дурта билә. Селәнә аһун эколого-экономическ төрмүдәр шинжлһнә халхар болн экономическ әәмшг уга бәәлһ тетклһнә төрәр хөрн жилдән көдлв. Эн жилин эргцд найн номин көдлмш бичгдв. Экономикин номин доктор, профессор Наталья Курепина келсәр, номин шинжлт кехдән йир дурта. Соньн зәнг олж авад, олзлна. Иим көдлмш седкл төвкнүлнә, соньн болна. Хара сууж болхш, шин тоот олж авхла байрта болна.
Өдгә цагт көдлмшин цагин ик зууһинь Наталья Курепина оютнрт тусхажана. Эднлә шинжлтын байн дамшлтарн хувалцжана. Профессорин келсәр, сурһульчнр ода багшан дураһад, номин шинжлтд дуран өгчәнә. Энүнә сурһульчн цугәрәсән болн танһчин марһасин дииләчнр болв. Эн оюьын келсәр, Наталья Леонидован эврән номин шинжлтәр көдләд, баһчудыг иим эрдмд орулжана. Оютнр олн-зүсн марһаст, селвлцәнд, хургт орлцна. Энүнә ашт эрдмин халхар медрлән гүүдүлжәнә. Профессорин көдлмшлә өөрхн танблдв. Сурһулян длаас кемд, энүнә шинжлт олзлнавидн. Номтын көдлмш сән дөн болжана гиж баһ наста номт келнә.
Номт Наталья Курепина эврәннь номин шинжлтлә талдан улсиг таньлдулхар зүткнә. Энүнә төлә экономистнрин олн зүсн хургт, методическ конференцд орлцна. Экономикин номин доктор, профессор Наталья Курепина һазрин көрн үнлһнә аһу ик көдлмш күцәһәд, танһчин экономикин делгрлтд ик тәвцән орулв. Энүнә кесн шинжлт һазрин алвна танһчин закадт олзлгдв. Экономикин номин доктор, профессор Наталья Курепина келсәр, сүл цагт күн болһна экономикин халхар әәмшг уга бәәлһюнә төр үүмүлжәнә. Бичкн орута әмтн яһж бәәхмб? Иим төрмүд оньдин соньн болж медгднә.
Номин үүлдвр күцәсн төлә иим өөдән ачлвр авсндан байрлжана. Эннь номтын күцәсн көлдлмшиг йосар үнлһнә темдг болжана. Ода болхла аридн аһун экологин болн экономикин халхсар әәмшг уга бәәлһнә төрмүдт нерәдгдсн дарани шинжлтән кежәнә. Энүнә олж авсн номин бәрмт номин халхар олз-туста болх гиж нәәлжәнә.
Ээнән Делгр, Настан Сергей
