Танһчин тавн школд шин предмет орулгджана
Сурһулин шин жиләс авн Хальмг танһчин тавн школд шин предмет — географь орулгджана. Ода энүг тавдгч классин сурһульчнр дасх. Урднь эдн природоведение предмет дасдг билә. Эннь мана регионд дамшлтын төсв болжана. Әрәсәд болхла школьн программд хойр минһн арвн тавдгч жилд сольвр орулгдх.
Эрдм-сурһулин шин кемжәһәр программд дамшлтын кичәлмүд орулгджана. Тавдгч-зурһадгч классмудын сурһульчнрин төлә географин учебникин зокьялч доцент Александр Летягина келсәр, кичәлмуд авсн медрлиг сурһульчнр иргчдән бәәдл-жирһлд олзлж чадх зөвтә. Эндр Әрәсән номт танһчин географин багшнрла семинар бүрдәһәд, шин учебникин туска цәәлһвр кежәнә. Энүг номт йинс жилдән белдсмн.
Доцент Александр Летягина келсәр, шин учебникд олн-зүсн эв-арһ орв. Тер тоод сурһульчнр эврән күцәх даалһврмуд бәәнә. Геогрфин предметар авсн медрл сурһульчнрт иргчдән олз-туста болхнь лавта.
Нарн һазриг яһж гертүлнә? Тег гисн юмб, энүнд ямаран мал-аһрусн бәәнә? Нарна часин дөнгәр яһж цаг медж болх? Иим сурврмудт багш хәрү өгәд, сурһульчнриг соньмсулж чадхла, көвүд-күүкд иргчдән иим медрлиг олзлж чадх. Өдгә цагин багшнр цагас хоцрх зөв уга. Тегәд оньдин медрлән шинрүлх зөвтә. Яшкульск олн халхта гимназин географин багш Светлана Делееван келсәр, шин дегтрт нарта-делкән туск медрл орж. Географин предметд талдан предметмудын медрл орна, тер тоод химин, туужин болн биологин предметмүд оржана.
Городовиковин нертә Троицк гимназин географин багш Наталья Белоус келсәр, учебникд дамшлтын көдлмш дала. Эннь бичкдүдт кергтә. Хоосн медрл авхд сурһульчнрт соньн болхш.
Танһчин эрдм-сурһулин көдләчнрин мергжлт өөдлүлһнә институтын директор Лилия Мунчинован келсәр, өдгә цагт эдн Әрәсән барин герлә бооца батлж авв. Эдн сурһульчнрин төлә дегтрмүд барлна. Батлж авсн бооцаһар шин учебникүдин зокьялчнр Хальмг танһчд ирәд лекцс умшх.
Институтын директор Лилия Мунчинован келсәр, шин учебникд тас талдан соньн эв-арһ орж. Дорас өсж баһчуд цуг халхар гүн медрл авч, энүг бәәдл-жирһлдән олзлх зөвтә.
Институтын иргч зурад туужмин учебникүдт онц оньг тусхагдхмн. Энүнә тускар Әрәсән Президент Владимир Путин шуд эфирт әмтнлә күүндсн цагт келсн билә.
Светлана Арстанова, Ирчин Алексей
