Элст балһснд видеокамер углж тәвхин төлә дала мөнгн кергтә

Элст балһснд видеокамер углж тәвхин төлә һучн тавн сай арслнг кергтә болжана. Әәмшг уга балһсн программ күцәхин тускар эндр танһчин правительствин президиумин сүүрт келгдв. Эндр өдрт хотл балһснд зуг йисн камер көдлжәнә. Эдниг ТСЖ-н медлд бәәх гермүдт углж тәвж. Элст балһсна администрацин элчин келсәр, әмтн бәәдг гермүдин эздүдин ниицән камер нәәмәдлһнә мөнг хотл балсһна администрацас некжәнә. Эннь хажһр гиж танһчин толһач Алексей Орлво темдглв. Тер мет сүүрт хаалһст фото болн видео зургуд кехин туск төр хәләгдв. Өдгә цагт хаалһст учрдг зеткртә йовдлмудын то ик. Давсн жилд хаалһст учрсн зеткртә йовдлмудын ашт зун зурһан күн әмнәсн хаһцв. Энүнә һол учрнь — машид дегд түргәр гүүлгжәнә. Тегәд мана региона хаалһст видеобүртклһнә систем олзлх төр тәвгджәнә.