Ик Царнг селәнд Дмитрий Медведевин олна приемн көдлв
Октябрьск район цутхлнг Ик Царнг селәнд Дмитрий Медведевин олна приемн көдлв. Хальмг танһчин олн-әмтнә хуралын депутатнр селәнә улсиг үүмлжәх төрмүд хаһлхин төлә района бәәрн әмтнлә харһад күүндв.
Хөрн жил хооран Мария Бадмаеван хадм эцкнь сәәһән хәәв. Харада Сангаджиевич Оглданов дәәнә ветеран, шунмһа күч — көлсч күн билә, һольшг зангта чанһ-чиирг күн бәәсмн. Дөчдгч жилд Улан цергт мордв. Энүнә хөөн төрскән харсгч дәәнә һалд орад, баатр-зөрмг кевәр дәәлдв. Күндәр шавтв. Дөчн һурвдгч жилин ноябрьсард Тегеран балһснд хойрдгч фронт секхин туск төрәр хамдан дәәлджәсн орн-нутгудын ончта конференц болсмн. Энүнд баатр-зөрмг болн дамшлтта салдс гиһәд, Харада Оглдановиг йовулж. Зуг энүнә хөөн салдсиг политическ засгла харһулад, киитн Сиврт туусмн. Тер цагас авн нег чигн военкоматд салдс Харада Оглджановин тускар ямаран чигн зәнг олдсн уга. Жанһр селәнә бәәрн күүкд күүнә тодлсар, хадм эцкнь әмд бәәсн цагт тас юмн керг уга гидг бәәж. Ода энүнә үрдүднь, ачнр-зеенрнь, жиж-зеенчнрнь аавиннь тускар үнн-чик йовдлынь илткж авх саната. лайф Мария Бадмаеван келсәр, олна приемнд ирәд, үүмүлжәх төрмүдән хаһлх саната. Хәрү дарунь ирнә. Тегәд Президентин олна приемнд оньдин одна.
Хошуд селәнә ахлач Евгения Моникова олна приемнд ирәд, ода селәнд хаһлж болшг нег төрин тускар келж өгв. Селәнд ода мобильн залһлдан уга болж зовлнг болжана. Района толһачла хамдан эн төрәр эдн талдан хам-хоша бәәх хойр селәнә улсла хамдан негдәд хаһлсмн.
Района толһач Санл Адьяевд иим хаһлх төрмүд дала. Үлгүрнь, танһчин һазрин сангд оурлгдсн района һазрин аһуг эдн эврә медлд оурлж авхар кесг жилдән көдлжәнә. Октябрьск района администрацин толһач Санл Адьяевин келсәр, района бюджетд оруһин халх нурһлж һазрин алвнас тогтна. Һазрин аһуг района медлд өгхин тускар министерствд бичг бичж. Ода болхла иим һазрас авлна мөнгн района хазнд орж иржәхш.
Дәкәд болхла танһчин хамгин холл бәәх района әмтн өдгә цагт Элст балһснла көлгн-күчнә залһлдан уга бәәнә. Эн төриг олна приемнд онц бүртклһнд авв.
Хальмг танһчин олн-әмтнә хуралын ахлачин дарук Хонһр Эльбиковин келсәр, улсин цуг төзрмүдиг хаһлхд жанһрта болна. Юнгад гихлә, цуг төрмүд нурһлж мөнгнә төрлә залһлдата. Тегәд иим төрмүдиг халһж болхш. Тер бийнь олна приемна көдләчнр танһчин улсин төрмүдиг хаһлхар шунжана. Тер тоод электрокүчн уга, телефона залһдана төрмүд улсиг үүмүлнә. Цуг төрмүдәс хөрн долан процентнь халһгдна. Әрәсәд ода эн кемжән хөрн һурвн процент тогтажана.
Шидр Әәдрхн балһснд Өмн үзгин федеральн округин олна приемна көдлмш шинжлгдв. Энүнә ашар Хальмг танһчин олна приемн хамгин сән тоод орв. Танһчин әмтн олна примена үүлдвр нәәлж, эдниг үүмүлжәх төрмүд хаһлгдх гиж иткжәнә.
Хавтхна Элла, Хулхачин Николай
