Танһчин эрдм-сурһулин учрежденьс сурһулин шин жилд белн
Танһчин эрдм-сурһулин учрежденьст сурһулин шин жил цаглань эклв. Цуг школмудт болн бичкдүдин садмудт көвүд-күүкдин төлә сурһулин болн бәәцин сән таал бүрдәгдв. Капитальн ясвр кегдв, шин оборудовань хулдж авгдв.
Октябрьск района Восход селәнә “Байр” нертә бичкдүдин садт һучн көвүн-күүкн оржана. Энүг секснә хөөн дошкольн эрдм-сурһулин учрежденьд чеерүд уга болв. Эн жилдин бичкдүдин садын эргднк аһу кеерүлһнә болн наадлһна плошадк яслһна төлә района бюджетас зун һучн сай арслнг йилһж өггдв. Садын өдр-бүүрин көдлмшин тускар мана сюжетд келгджәнә.
Байр садын һардач Татьяна Корникован келсәр, садт шин наадлһна плошадк тосхгдв, шин мебель хулдж авч. Ода бичкдүд нааддг һазр бәәнә, эдн садт одхдан дурта.
Ик Царн селәнә Айс нертә бичкдүдин садт района бюджетас йилһж өгсн мөнгәр герин ора ясхар шиидв. Энд хуучн герин оран ормд шин төмр черепиц тәвх саната. Энүнә аһунь нәәмн зун тәвн дөрвлжн метр. Цөн өдр болад ясврин көдлмш төгсх зөвтә. Шинрүлгдсн дошкольн учрежденьд зун арвн хойр көвүн-күүкн орж чадх.
“Айс” нертә бичкдүдин садын һардач Вера Музраеван келсәр, энд хурц төрнь — герин ораһар дусал дусдг бәәж. Района администрацин дөнгәр ода шин ора делггдх. Ода эн хурц төр күцц хаһлгдхмн.
Района администрацин эрдм-сурһулин әнгин һардачин келсәр, эн өдрт района һардачнр дошкольн учрежденьст цуг кергтә дөн күргжәнә. Эннь Әрәсәд эрдм-сурһулин шин закан үүлдврт орснла залһлдата. Эн жил бичкдүдин садмуд шинрүлж яслһна төлә тавн зун дөчн минһн арслнг района бюджетас йилһж өггдв. Тер мет Ик Царнг селәнд бичкдүдин сад бас шинрүлж ясгджана.
Октябрьск РМО-н администрацин эрдм-сурһулин заллтин әнгин һардач Виктор Манджариковин келсәр, бичкдүдин садын ясврин төлә мөнгн йилһж өггдв. Удл уга шинрүлгдсн сад секгдх. Тегәд Ик Царнг селәнд дошкольн учрежденьд чеерүд уга кегдх.
Района школмудын тускар келхлә, эдн цугтан эрдм-сурһулин үүлдврән күцәжәнә. Эднә зәрмнь капитальн ясвр кеж чадв, шин мебель хулдж авв.
Восход поселкин школын директор Светлана Копаеван келсәр, школ сурһулин шин жилд күцц белн болв. Зураһар темдглсн ясвр кегдв, шин үүд углж тәвв, негдгч классин төлә шин парт хулдж авгдв.
Эн жиләс авн школмудын сурһульчнр учебникүд өнгәр авцхав. Эклц классмудын сурһульчнрин төлә библиотекин сангд һурвн зун дегтр ирв. Тер мет негдгч классас авн арвн негдгч класс күртл хальмг келнә болн литературин учебникүд ирв. Тер мет района администрац баһ тетквртә болн инвалид бичкдүдин төлә дегтрмүд хулдж авхин төлә һучн дөрвн дундур минһн арслнг йилһж өгв.
Восход селәнә школын библиотекарь Любовь Жарикован келсәр, сурһульчнрт өнгәр учебникүд өгснь сән керг. Нег үлү, олн үртә өрк-бүлмдүт. Ода дегтрмүд унтә.
Эрдм-сурһулин халхар сән талднь сольвр болжахнь ил үзгджәнә. Бичкдүдин садмудт чеерүдин төр хаһлгджана, сурһульчнрин төлә сән таал бүрдәгджәнә. Иим көдлмш зуг Октябрьск районд биш, талдан чигн райодт күцәгджәнә.
Елена Алексенко, Хавтхна Анатолий
