Садовое селәнд бичкн чонж секгдв

Хойр дам байр болв. Сарпинск района цутхлнг Садовое селәнд бичкн чонж — часовнь байрин бәәдлд секгдв. Энүнә тосхлт хойр минһн арвн негдгч жилд төгссн билә, сүл жилдмүдт энд зуг шалдарин болн ширдлһнә көдлмш кегдв. Байрт селәнә улсла хамдан хам-хаша бәәх поселксин әмтн олра ирж орлцв.

Евгений Перфильев Садовое селәнд төрәд, өсж-боссн күн. Төрскн һазртан олз-туста керг күцәхәр бичкнәсн авн ухалж санжасмн. Урднь Евгений тосхач болж көдлжәсмн. Бичкн чонж бәрх санан ик кезәнәс авн толһаднь орсмн. Хойр минһн арвдгч жилд эврәннь мөнгәр бичкн чонж часовнь экләд тосхв. Нег жил болад цуг тосхлтын көдлмш кегдв.

Евгений Перфильевин келсәр, дәәнә цагт селәнәс әмнәсн хаһцсн дәәчнрин санл мөнкрүлхин төлә иим чонж тосхгдв. Бурхн угаһар бәәхд күнд болдгинь селәнә әмтн медх зөвтә. Садовое селәнд бәәх ик чонжд болн часовнь одх кергтә. Бичкн чонж селәнә үкәрин өөр бәәнә.

Садовое селәнә улсиг болн Сарпинск района бәәрн әмтиг йөрәхәр танһчин толһач Алексей Орлов болн Элстин, Хальмгин епископ Зиновий ирв. Епископ Зиновий шин часовнь әрүслһнә мөргүл күцәв.

Епископ Зиновий келсәр, эврәннь танһчин улстан дурта болжанат. Әмтн бәәхтә жирһлтә болх. Эндр та әрүн шүтә нааран авч ирвт. Эннь олн улсиг әрүслж цеврлх.

Сентябрин хөрн негнд бичкн чонжс ексн өдр православн әмтн Пресвятая Богородицан төрсн байр темдглсн билә. Эннь бас темдгтә йодвл болв. Тегәд эн өдр нааран ирсн улст хойр дам байр учрв.

Энүнә келсәр, әрүн седкләсн ханлт өргжәнә. Бурхн мадниг мартжахш. Эннь ик байр үүдәжәнә. Әмтн бат итклтә бәәнә. Эн күүнә келсәр, хамгин түрүнд энтн седклин байр. Иим байр өдр болһн болхш. Иим ке-сәәхн часовнь тосхгдж әрүслгдв. Эн күүнә темдглсәр, иим керг йир сән. Танһчин цуг улст байр болжана. Шин чонж эс гиж суврһн тосхгдхла танһчин әмтнд байр болна.

Элст балһсна бйрин өдр иим хол селәнд ирәд эдниг йөрәснд района улс танһчин толһач Алексей Орловд ик ханлтан өргв.

Танһчин толһач Алексей Орловин келсәр, иим керг Элстин болн хальмгин епархин үүдәгч болн бүрдәһәчнрин үүлдврин аш болв. Иим бичкн чонж оюни босхмжин дарани девснг болжана. Мана танһчд олн келн улс болн олн шажнд шүттг улс ни-негн бәәнә.

Садовое селәнд шин часовнь төрскән харсгч дәәнд әмнәсн хаһцсн салдснрин бумбин болн селәнә үкәрин хоорнд тосхгдв. Тегәд дәәнә цагт әмнәс хацһсн салдснрин болн сәәһән хәәсн улсин санл мөнкинд үлдх гиж бәәрн улс келнә.

Баира Петрова, Мятежный Максим