Бичкдүдиг дөннлһнә төлә мөнгн йилһж өггдв

Федерация Синкиокусинкай Калмыкии нертә олна ниицән жирһлин күнд бәәдлд туссн бичкдүдиг дөннлһнә төлә күсдундур сай арслнг йовулх. Нарта делкән классин спортын мастер Марина Анфимован проектиг буйнч седклин сан дөннв. Йилһж өгсн мөнгн бичкдүдин төлә бүрдәгдх керг-үүлдврмүдин төлә олзлгдх.

Чемпионк Марина Анфимоваг болн энүнә сурһульчнриг олж авхд күнд болсн уга. Урдк кеәвр эдн “Ринг” нертә бичкдүдин спортивн клубд дамшлтан өөдлүлжәнә. Ода энүнә һардврт тәвн көвүн-күүкн көдлжәнә. Эднәс арвн тавнь Лагань балһснд болн арвнь Комсомольский селәнд бөк бәрлдлһ Дасжана. Синкиокусинкай дәәчин эрдм бичкдүдин болн баһчудын жирһлд туслх эв-арһ нертә төсв эдн белдсн бәәж. Эднә белдсн төсвиг жирһлин күнд бәәлд туссн бичкдүдиг дөннлһнә буйнч седклин санг дөннв. Аштнь эдн күсдундур сай арслнг грант шүүж авв. Энүнәс өрхлнь долан зун тәвн минһн арслнг федерацин зура күцәлһнд йовулгдв.

Хальмг танһчин синиккусинкай каратэн федерацин күцәгч директор Марина Анфимован келсәр, иим грант өгхлә, дала керг-үүлдвр жирһлин күнд бәәлд туссн бичкдүдт бүрдәж давулх кергтә. Ут-тоодан арвн тавн керг-үүлдвр зуралв.

Эндр өдрт эн мөнгәр тренажермуд хулдж авгдв. Зәрм мөнгн инструктормудын мергжлт өөдлүлһнә төлә олзлгдх. Анфиомован тоолврар, жирһлин күнд бәәдлд туссн бичкдүдлә көдлхин төлә шишлнг медрл кергтә. Энүнд олн-зүсн наста көвүд-күүкд бәәнә. Эннь бас учрта. Юнгад гихлә, каратэн федерацин программин тускар хотл балһсна микрорайодт болсн байрин йовудт зәнглсн билә. Жирһлин күнд бәәдлд туссн көвүд-күүкдин төлә эднә социальн күнд бәәдл тоод авад, каратэ синкиокусинкай сурһуль өнгәр кегдх гиж зарлгдв.

Марина Анфимован келсәр, грантын мөнгәр велосипед хулдж ач. Бичкдүдин ухалжасн күцл күцв. Ода тенгрин бәәдл сән болхла, велосипедар йовж болх. Көвүд-күүкд ик байрта бәәнә. Эн көвүнә келсәр, каратэ таасгдна. Өрәл жилдән секцд оржана. Арвдгч кю зүүв. Түрүн болж ээжтәһән ирж. школд зар умшад нааран ирв. Зурһан настадан ирв гиж эн көвүн келв. Энд тас талдан бәәдл. Цугтан цаһан седклтә. Энд шин эв-арһ болн дамшлт авч болх гиж күүкн келнә.

Арвн наста Баснг Комушев алдр бөк Комушевин жич болжана. Бөк бәрлдлһнә ормд каратэн эв-арһар бөк бәрлдсндән Баснг һунджахш. Ода көвүн нәәмдгч микрорайонд бәәнә, каратэн секцд болхла һучрвдгч микрорайонд одх кергтә.

Баснг Комушевин эк Ользят Комушеван келсәр, энүнә көвүнь каратэһар икәр соньмсдг болв. талдан бичкдүдиг хәләһәд, нааран орхар седв. Каратэ бичкдүдт сән таал өгнә. Сән сурһмж өгнә, сән багшнр энд көдлжәнә.

Тер мет дамшлһна өдрмүдиг Эльза Бадмаеван ачнр-зеенр бас тенкән уга гидгәр күләнә. Ээжин келсәр, ахр цагин эргцд ачнр-зеенрнь тас талда бичкдүд болж одв.

Ээж Эльза Бадмаеван келсәр, бичкдүдт каратэ таасгджана. Ик эртәснь дамшлһна өдр күләнә, долан хонгт һурв дәкж нааран ирнә. Дуран өгч сурһуль энд дасжана.

Каратистнрин зурад талдан нег ик программ бәәнә. Эннь бичкдүдин спортивн цутхлнг тосхлһн. Энүнә төлә түрүн ишкдл кегдв. Иим программ күцәгдхлә, удл уга дорд үзгин эв-арһа бөк бәрлдлһнә спортар цуг бичкдүд дамшлтан өөдлүлж чадх.

Батан Санжирма, Ирчин Алексей