Православн чонжин элчнр социальн учрежденьд одв

Рождественск белгүд. Жил болһн байрин өдрмүдт Элстин болн Хальмгин епархий көгшүдин герт болн бичкдүдин гер-интернатд гиичд одна. Эн жил эн зангшалыг эдн бас күцәв. Эн саамд православн гелнгүд эднд хувц уһадг машинк белглв. Владыка Зиновий социальн учрежденьсин улсиг әрүн үсар әрүслв.

Өрүн эртәс авн көгшдүдин герт гиичнриг күләв. Рождествон байрин өдрлә нааран жил болһн Элстин болн Хальмгин епископ владыка Зиновий ирнә. Эн саамд гиичнр белгүдән авч ирв. Хувц уһадг машинк учрежденя көдләчнрт сән дөнгәр күргх. Епископ Зиновий тоолврар, иим буйнч седклин керг-үүлдврмүд нег-негндән дөн күргж оньг тусхахд сән нилчән күргнә. Нег үлү, ор һанцхн үлдсн көгшн-медәтә улст иим оньг тусхах кергтә.

Элстин болн Хальмгин епископ Зиновий келсәр, рождествон байрин өдрмүдт эврәннь оюни байрарн хувалцхар нааран ирв. Әмтнә иткл батрулхин төлә иим буйнч седклин керг-үүлдвр күцәгднә. Иим керг-үүлдврмүд медәтә улсиг батрулж, күнд түрү жирһл дааж һархд туслх зөвтә. Эднә зовлнгнь невчк баһрх.

Епархин гиичнр дкәд нег хувц уһадг машинк көгшдүдин нерлә хам-хоша бәәхбичкдүдин гер-интернатд белглв. Тер мет Казанкс кафедральн чонжин гелнгүдин авч ирсн әмтәхн хот-хол эрүн сергмжтә байрин сән белг болв.Дәкәд болхла Рождестовн байрин өмн өргнд Элстин болн Хальмгин епархийн гелнгүд засг күцәлһнә колоньд одад ирв. Тенд суусн әмтнд епископ Зиновий әдс өгв.

Епархин сегләтр протиерей Алексей келсәр, иим керг-үүлдврмүд күцәһәд, православн чонж талдан улст сән үлгүр-үзмж болжана. Иим байрин яһж тосж давулхинь үзүлжәнә. Байрин өдрмүдт православн чонж олн оршәнһү седклин керг күцәхәр зурална. Эннь гелнгүдин төлә кегджәхш, иим өдрмүдт бидн жирһлин һол чинринь тускар ухалх зөвтәвидн.

Казанск кафедральн чонжин хор рождестовн байрин ду дуулж өгв. Православн чонжин гелнгүдиг сән седвәриг талдан чигн арһта улс дөннәд, жирһлин күнд бәәдлд туссн дөн күләжәх улст цаһан седкләсн нөкд болхла сән болх гиж сангдна.

Батан Санжирма, Очра Сергей