Шин тоосхин завод эдлврт орулгдв

Баһ Дөрвд селәнд шин тоосхин завод эдлврт орулгдв. Танһчин тосхлтын ик компаня орулж өгсн инвестиционн төсвиг танһчин һардвр дөннв. Промышленн ик обьект хойр жилдән тосхгдв. Тоосхин завод йосн күчндән хойр сар болад орх гиж шин предприять байрин бәәдлд секлһнд келгдв. Энүнд нег жилдән арвн тавн сай тоосх кеж һарһгдхмн.

Шин завод эдлврт орулснь йоста туужлгч йовдл болв. Баһ Дөрвдә районд промышленн ик обьект тосхгдсн йовдл танһчин туужд ончта йовдл гиж бичгдх. Шин завод Хальмг танһчин тохслтын халхиг тоосхар тетксн деерән, талдан чигн регионмудт хулдгдх. Нег жилдән арвн таван сай тоосх кеж чадх.

Танһчин толһач Алексей Орловин келсәр, советин йосна цагт мана танһчд көдлжәсн хойр силикатн завод эн предприятин кеж һарһдг продукцин өрәлинь чигн кедго билә. Эннь ик чинртә керг болжана. Энд кесн тоосхин талдан регионмудт хулдх арһ бәәнә.

Заводын кеж һарһсн продукциг тосхачнр ик кезәнәс авн күләжәнә. Сүл цагт мана танһчл тосхлт шин делгрлт авчана. Завод тосхгджасн кемд кесг компаньс тоосх хулдж авхин тускар эрлһ бичв. Генеральн директор Юрий Убушиевин келсәр, шин предприять йосн күчдән нег-хойр сар болад орх. Ода энд найн күн көдлжәнә. Эдн шин таалд көдлдг дамшлт хоршажана. Энд көдлжәх көдләчнр Ставрополин, Воронежин болн талдан чигн балһсдын промышленн предприятьд сурһуль дасад дамшлт хоршасн билә.

Эн күүкд күүнә келсәр, көдлмшин диг-даран таасгджана. Дөрвн өдр көдләд, хойр өдр амрна. Көдлмшин таал чигн бас сән.

Баһ Дөрвд селәнд тоосхин закод бәрснь бас учрта. Района аһуд предприятяс арвн —арвн тавн дуунад шаврин болн элснә көрнгтә һазр бәәнә. Энүнә шаврин болн элснә чинрнь мана орн-нутгин талдан көрнгәс сән. Тосхлтын туск инвестиционн зөвшәлт танһчин ик тосхлтын компаньла батлж авгдв. Тиигхд хойр жил хооран эдн ик төсв күцәлһнә көдлмш эклсмн. Танһчин толһачин темдгләср авсн даалһвран эдн сәәнәр күцәж чадв.

Алексей Орловин келсәр, ода деерән кеж күцсн көдлмшин чинринь сәәнәр медәд угавидн. Сүл жилмүдт эннь мана танһчд тосхгдсн түрүн иим ик прдеприять болжана. Иим тоосхин заводыг тосхачнр күләжәсмн. Энүнә дөнгәр әмтн бийдән гермүд тосхж чадх. Талдан чигн тосхлт күцәж болжана. Инвестормудт тер тоод Владимир Мацаковдж ик ханлтан өргжәнә.

Инвестор Владимир Мацаковин келсәр, иим тоосхин завод мана танһчд экр биш кергтә. Әмтн тоохс хулдж авх саната. Ода болхла танһчин улс талдан холл һазрас тосхлтын материал хулдж авна. Энүнә төлә дала мөнгн талын һазрт одна. Шин завод тосхнс хөөн нааран мөнг орулж болх. Энүнәс иштә района болн танһчин экономик делгрлт авх.

Промышленн ик обьект эдлврт орхла района экономик бас делгрлт авх зөвтә. Ода энд найн күн көдлжәнә. Эдн цугтан района бәәрн улс болн хам-хоша бәәх селәдин әмтн. Ирчгдән шин заводт зун тәвн күн көдлх зөвтә. Района администрацин толһачин келсәр, шин предприять эдлврт орсн хөөн талдан чигн төрмүд халһгдх.

Района администрацин толһач Геннадий Золочевский келсәр, шин предприятьд района әмтн көдлжәнә. Эдн эврәннь кесн продукцар гермүд тосхж чаджана. Талдан һазрт одх керг уга. Шин предпприятин дөнгр тосхлтын халх цаарандан чигн делгрлт авх зөвтә.

Тер саамд инвестор болн предприятин һардачнр шин зура темдглж авчана. Эднх зураһар энд консервн завод тосхгдх зөвтә. Энүг шин заводын кеж һарһн тоосхар бәрх зура бәәнә. Шин обьектин аһуд тәргдх зер-земшин садын продукц заводт эд-бод кегдх.

Энд агрохолдинг бүрдәх зура бәәнә. Зер-земшин ик сад тәргдх, уста үзм урһаж авх зура бәәнә. Шин теплиц бәрх саната. Газотурюинн станц көдлх, колбасн, консервн завод бәрх зура бәәнә.

Шин жилин өмн өргнд хойр минһн арвн һурвдгч жилин декабрин һучн негнд хальмгин промышленностин нүүрлгч предприять Баһ Дөрвдә тоосхин завод эврәннь туужан эклв.

Чучян Валентина, Бадмаран Владислав