Правительствин дарани сүүр болв

Эндр танһчин правительствин дарани сүүр болв. Энүнд зурһан төр хәләгдв. Тер тоод һол төр болж эрдм-сурһулин федеральн государственн кемжәнд орлһна төлә муниципальн эрдм-сурһулин учрежденьс белдвр келһнә төрәр тодрха күүндвр кегдв. Эрдм-сурһулин министрин дарук Раиса Дякиеван келсәр, ода сурһулин халхар шин эв-арһ олзлгджана, тер тоод информатизацла залһлдата эв-арһ онц орм эзлжәнә. Кичәлмүд нурһлж күүндрин таалд кегджәнә. Тер мет эклц школын педагогическ коллективин көдлмш бас хүврв. Тегәд багшнр эврәннь көдлмшән шин некврмүдлә ирлцүлж күцәжәнә. Элст балһсна хойр школ арвн доладгч болн хөрн негдгч школмуд пилотн учрежденьс гиж йилһгдв. Энүнд тавдгч классин сурһульчнр эрдм-сурһулин шин кемжәһәр сурчана. Элст балһсна администрацин толһач Артур Дорджиевин келсәр, ода сурһулин заведеньст селәдин бичкдүд ирәд, классмудт сурһульчнр олн болжана. Сүүрин йовудт танһчин райодын элчнр докладмуд кев. Эдн эрдм-сурһулин шин кежмән яһж күцәгджәхин тускар премьер-министр Игорь Зотовд келж өгв.