Хальмгт браконьермудын то баһрв
Эндр Әәдрхн балһснд Хальмг танһчар болн Астраханск областяр Әрәсән ФСБ-н пограничн заллтын ахлач Вячеслав Бирюков пресс-конференц кев. Энүнд давсн жилин көдлмшин аш диглгдв. Наркоконтролин көдләчнрлә хамдан заллтин эчлнр межә һатц олн наркотикүд авч орулх йовдлмуд илткв.
Пресс-конференцин эклцәр темдглсн диг-даран сольгдв. Күүндвр эклхин өмн Вячеслав Бирюков браконьермуд бәрж авсна тускар келж өгв. Эдниг Лаганьд бәрж авч. Эднә онһцд хөрн бекр заһсн илткж авгдв. Тер мет заһс бәрдг гөлм бас илткж авгдсмн. ФСБ-н пограничн заллтин ахлач Вячеслав Бирюковин келсәр, усна көрнг харлһна туст күцәгдсн үүлдврин аш диглгдв. заллтин чидлмүдиг болн эв-арһсиг хүврлх төр тәвгдв. Энүнәс иштә үүлдврин зөрүлт сольгдв. Нег өдрин эргцд Әрәсән зака эвдсн арвн зурһан йовдл илткгдв. Зака эвдсн улс засгла харһулгдсмн.
Иим зака эвдсн йовдлмуд олн. Давсн жилд эн халхар зун уголовн керг күцәгдв. Зарһд хөрн керг йовулгдв. Дөчн һурвн күн засгла харһулгдсмн. Ут-тоодан зун арвн онһц болн зу һар мотор бәрж авгдж. Үлгүрнь, нег моторин үн ода өрәл сай арслнг күрчәнә. Бәрж авгдсн цуг оборудовань государствд орулж өггдв. Вячеслав Бирюковин темдглсәр, Астраханск областьд болн хальмг танһчд зака эвдсн йовдлмуд һарна. Хальмг танһчин ФСБ-н болн Лаганск района һардврин дөнгәр саглулчг керг-үүлдврмүд күцәснә ашт иим йовдлмудын то баһрв. Тер бийнь браконьермуд зөв угаһар заһс бәрдг йовдл һарна. Иим улсиг бәрж авад, зака эвдсн йовдлмудыг уга кех күцл тәвгджәнә.
Январин нег шинәс авн пограничн кемжәнә шин зокал орулгдв. Ода пограничн һазрт орлһна, дав зуур бәәлһнә диг-даран гиигрв. Әрәсән күн болһн иим һазрт орж зөв бәәнә. Энүнә төлә шишлнг цаасн керг уга. Зуг паспорт болн талданч игн иткүлин документ үзүлх кергтә. Тер мет баһ кемжәтә онһц тоод орулһна зокал сольгдв. Урднь иим онһц хулдж авсна хөөн тавн өдрин эргцд энүг темдглж бичх кергтә бәәсмн. Ода болхла эн болзг иим чанһ биш. Ода ик оньг шишлнг операцд ик оньг тусхагджана. Тедн дунд “Алтн торһн зам”, “Союз”, “Анаконда”, “Мак” нертә керг-үүлдврмүд бүрдәж давулгджана. Иим нег шишлнг операц кеснә ашт наркотик авч йовсн күн бәргдв. Эн күн межә һатц наркотикта хөрн йисн контейнер орулхар седж. Дәкәд нег күн бәргдв. Эн саамд поездин вагонд нуувч һазр бәәж. Таджикистана күн Әрәсәд арвн килограмм героин хулхара авч йовсн бәәж. Вячеслав Бирюковин келсәр, Әрәсән аһуд наркотикүд тархалһна төр хурц төрт хүврв. Иим хорта эв-арһ эмд бәәнә. Энүг Китдин орн-нутгт хулдж авад, Казахстанд хулдна.
Әрәсән аһуд чигн орулж хулдхар седнә. Давсн жилд иим һучн йовдл илткгдв. Ут-тоодан һурвн зун килограмм хорта эм илткж авгдв.
Эндр өдрт межә харлһна төлә шин техническ эв-арһ олзлгджана. шин катермуд ирв. Тер тоод дебаркадер ик дөн болжана. Иим төсв Әрәсәд түрүн болж күцәгджәнә. Хойр минһн арвн тавдгч жил күртл Лагань пограничн әнг секгдх. Энүнә төлә административн гер болн көдләчнр бәәх хойр гер тосхгдхмн.
Дмитрий Ивахненко, Владислав Бадмараев
