Лагань балһсна школд сурһульчнрт сән таал бүрдәгдв
Негдгч тойгта Лаганск школд дула өгдг автономн систем углж тәвлһнә төлә нег сай арслнг йилһж өггдв. Сурһулин заведеня һардврин тоолврар, ода түлән әрвнәр олзлгджана, дула өглһнә мөнгн чигн баһрв.
Ода школд дулан болн сарул гиж дула өгдг оператор келнә. Ода дула өглһнә цутхлнг системас һарсна хөөн, цуг классмудт болн кабинетмудт дулана кемжәг эдн эврән тогтаж чаджана. Нег үлү, һаза дулан болхла, газ олзлһна кемжәг баһрулж болх. Школын директор Татьяна Соломенцован келсәр, автономн систем орулсна хөөн мөнгн әрвлгджәнә. Школын директор Татьяна Соломенцован келсәр, давсн жиллә дүнцүлхлә, дула олзлсн мөнгнә кемжән кесг холванд баһрв. Нидн жилин зурһан сард хойр зун хөрн нәәмн минһн арслнг һарсн болхла, эн жил зун далн нәәмн минһн арслнг өгв. Эннь школд болн муниципалитетд олз-туста болжана.
Онц темдглхд, далн тавн жилин туршарт энд түрүн болж капиатльн ясвр кегдв. Школын гер хуучрад, ик ясвр кех кергтә болв. Герин ора, терз-үүд сольхин төлә дөрвн сай арслнг федеральн мөнгн һарв. Тер мет искусствин школын гериг бас ясх кергтә. Эн гер бас дула өглһнә автономн системд оурлгдв. Урднь хуучн герт киитн болад, сурһульчнр даардг бәәсмн. Ода болхла энд дулан.
Директор Евгений Бембеевин келсәр, танһчин толһач нааран ирсн кемд хойрдгч корпусин гер шинрүлхд дөн күргхән медүлсн билә. Евгений Бембеевин келсәр, шинрүлгдх школын герт хойр зал бәәнә. Негнь актов зал болх, талдан зал хореографин төлә өггдх. Энүнд шин оборудовань углж тәвгдхмн. Сурһульчнрт цуг бәәцин таал бүрдәгдх.
Эн жил искусствин школд немр хойр әнг урн һарин эрдмин болн театральн әнг секгдв. Ода уйн наста артистнр алдр Диилврин байрин өдрт белдвр кежәнә. Талдан классмудт бичкдүд домб, гитар цокжана. Хореографическ залд бичкн Аня күүкн багшин зааж өгсн сурһуль дасжана.
Директорин келсәр, жил ирәвс искусствин школд орх бичкдүдин то өсәд йовна. Школын сурһульчнр олн-зүсн марһаст болн фестивальмудт орлцна. Нарта-делкән марһанд орлцад, ачлврмуд авч ирлә. Ода селәнә школд сурчах көвүд-күүкд өсхләрн нертә артистнр болад, эврәннь һазрин болн танһчин нер холд туурулх ицл бәәнә. Энүнә төлә ода бичкдүдт сурһульднь цуг таал бүрдәгджәнә.
Ээнән Ольга, Бадмаран Владислав
