Октябрьск района Хошеут селәнд шин бичкдүдин сад эдлврт орулгдв
Октябрьск района Хошеут селәнд шин бичкдүдин сад эдлврт орулгдв. Хөрн негн ормта, эврә хот уудг, онц нааддг хората, бичкдүдин сад СПК-н администрацин негдгч давхрт бәәршлсн бәәнә. Энүнәс нань һаза эргнд цевр аһар кииләд сул цаган давулх һазрин межә бас бәәнә. Эн сад секлһнә көдлмшт селәнә бәәрн улс шунмһаһар орлцсмн, района администрац мөнгнә дөнг һарһж өгсмн.
Хошеут селәнд «Байрта» нертә бичкдүдин сад секлһнә йовдл йоста ке-сәәхн байрт хүврв. Байрин хамгин һол орлцачнр дигтә өкәр сәәхн күүкд-көвүд болв. Эн бәәшнгд ясврин көдлмш эклсн түрүн өдрәснь авн олн эк-эцкнр дөнгән күргхәр зүткцхәв — гиж хойр бичкн көзвүнә эк Виктория Мацакова келнә. Мана үрдүд таалта садт орж, цаган соньнар давултха гиһәд эк-эцкнр эн садыг ширдлһнцкврлһнә халхаин көдлмшт шунмһа кевәр орлцв — гиж Виктория Мацакова күүндврән цааранднь давулв.
Ясврин көдлмшин ашт бәәшнгин орань шинрүлгдсмн, ус оруллһна системинь ясгдж, шинүүдд, тезрмүд углж тәвгдсмн. Бичкдүд цаган давулх хора болһнь эврә зүстә болв. Цуг эн тоотас нань хамгин һоллгчнь гимж бичкдүдт медрл өглһнә, эднә медрл өөдлүлһнә суруһлин систем белдгдсн бәәнә.
Октябрьск районда цутхлнг селәнәс зөвәр уужмд бәәх селәнүр бичкдүдин, эднә эк-эцкнринбайр хувалцхар Хальмг танһчин правительствин ахлач Игорь Зотов ирсмн. Тадна байр хувалцад, иим бәәшнг бичкдүдин төлә босхлһнд орлцсн цуг улст ханлтан өргжәнәв. Бичкдүд-мана иргч болжана. Иим цагаснь авн цуг таал бүрдәһәд өскхлә, эдн төрскндән туста үрдүд болж өсхнь маһд уга —гиж келәд, Игорь Зотов шин бәәрнд орсн бичкдүдт компьютер белглв.
Эн бәәр яслһнд селәнә күн болһн орлцв гиж темдглх кергтә. Района бюджетас болхла зун минһн арслнг мөнгн һарһгдж өггдсмн. Хошеут селәнә СМО болн эдл-аху бас-дөнг-нөкдән күргсмн. Района һардач Санал Адьяев келсәр, цуг района бичкдүдиг иим садар теткхин кергт олн-зүсн эв-арһ хәәх кергтә борлна. Эн хөрн негн ормта бичкдүдин сад болхла СПК-н административн бәәшнгин негдгч давхрт секгдсн бәәнә.
Келхд, орн-нутгин һардвр ирх һурвн жилин эргцт цуг бичкдүдиг ормар тетгх зура өмнән тәвжәнә. Хальмг танһчин тускар келхлә, федеральн көрнгәс ирсн мөнгн нурһлж бичкдүдин сад тосхлһна болн яслһна кергт йовулгдхмн. Хойр минһн арвн зурһадгч жилд цуг бичкдүд бичкдүдин садт ормар теткгдх зөвтә.
Ээнән Ольга, Хавтхан Анатолий
