Элстин эрдм-билгин училишин сурһульчнр Ар Кавказин билгтә бичкдүд марһанд орлцад, лауреатнр болв

Элстин эрдм-билгин училишин сурһульчнр Ар Кавказин билгтә бичкдүд гидг региональн хойрдгч марһанд орлцад, лауреатнр болв. «Фортепиано», "Келн-әмтнә зевсгүд» болн "Вокал» гидг номинацд зу һар орлцачнр билг-эрдмән үзүлж марһцхав. Марһана һол күслнь — баһ наста билгтнриг дөнглһн болжана.

Үвлин декабрь сарин киитн өдрмүд баһ наста билгтнрт хамгин дааврта цагин негнь болв. Владикавказ балһснд Ар Кавказин көгжмин школмудин болн эрдм-сурһулин школмудин хамгин сән сурһульчнр цуглрв. Марһан хойр девснгәр давв. Жюрин гешүдин темдглсәр. пианистнрин марһанд мана танһчин элч арвн наста Бадуш Санджиев эврәннь билг-эрдмәрн өврүлв. Аштнь Бадуш һурвдгч мөрән лауреатин нер зүүв, дәкәд болхла жюрин гешүдин шишлнг мөрә авв.

Бийнь Бадуш келсәр, дамшлт баһ болад бәәв, дәкәд болхла, невчк үүмәд, эмәһәд бәәв.

Мана баһ наста биичнр болхла «Хореография» номинацд орлцв. Эдн жюрин оньгт цуг арһ-чидлән һарһад, хамгин сәәхн бииһән үзүлхәр зүткв. Юнгад гихлә эн номинацд зуг бииһин кев-янз биш, өмссн хувцна кев-янзнь бас тоод авгджасмн. Тегәд бидн хальмгиннь неригҺарһхин кергт билг-эрдмән сәәнәр үзүләр зүткдвдн гиж Кермен Цебикова болн Сергей Мудаев келнә.

Марһана йовудт школьн программд ордг көгжмәс чинрәрн өөдән чигн үүдәвромүд сонсгджав гиж багшнр келнә. Көгжмин багш Ирина Овшиеван келсәр зәрм күүкд-көвүд иим марһанд түрүн болж орлцв.Эдн Иим өөдән чинртә марһана йовудыг үнлсн деерән, талдан коллективсин билг-эрдмиг үзж, үнлж чадцхав. Дәкәд ямр чигн марһан эврә эндүһән медх арһ өгдг болжана. Күүкд-көвүдт иим марһан цаарандк үүдәлтин хаалһднь билг-эрдмән делгрүлх күсл өгдг боложана.

Эн марһанла зергдән Нальчик балһснд Элстин эрдм-сурһулин «Келн-улсин зевсгүд» нертә әнгин оютнр орлцата талдан үүдәгч марһан давв. Мана баһчудин билг-эрдм зөөвәр өөдәнәр үнлгдв.

Ээнән Ольга, Колдан Церн