Классическ көгжмин концерт болв
Өргн хур олн улсин чикнә хужр ханһав. Москва болн Санкт-Петербург балһсдын хамгин сән гисн көгжмин сурһулин заведень сурчах көвүд-күүкдлә болдг рождествон харһлтсин программар Элст балһснд классическ көгжмин концерт болв. Эн саамд уйн наста билгт өргн хуурч Элина Бядниева эврәннь билг-эрдмәрн олн улсиг байрлулв.
Элина Бядниева көгжмин халхар ннәмн жилдән суруль дасжана. Өргн хуурар нааддг эрдмиг түрүн авгтан Элст балһсна негдгч тойгта бичкдүдин көгжмин школд дасж авч. Ода Элина Петр Ильич Чайковскийн нертә Москван государственн консерваторин медлд үүлджәх цутхлнг көгжмин школд сурчана.
Өргн хуурч Элина Бядниеван келсәр, көгжмин школд энүг экнь авч ирж. Экнь бас өргн хуурар наадна. Гертән өоньдин иим көгжм сонсдг бәәж. Тегәд өргн хуурар наддг эрдм дурлв.
Элст балһснд Әрәәсн хотл балһсна хамгин сән сурһулин заведеньст көгжмин сурһуль дасжах баһчудла рождествон байрла болдг харһлт сән зангшалд тохрв. Уйн наста билгтнр үвлин кемд герт талан хәрж ирәд, амрсн деерән, эврәннь билг-эрдмән үзүлнә, эврәннь нег һазра улсан шин жилин байрла болн Рождествон байрла йөрәнә. Эн жил иим арһ Элина Бядниевад учрв. лайф Хальмг танһчин сойлын министр Амулнг Учурован келсәр, иим билгтә көвүд-күүкдлә кедг харһлтс сән авьяст тохрв. Эдн цугтан танһчин болн Әрәсән көгжмин эрдм-сурһулин учрежденьст сурчана. Эн саамд Элина һанцхарн иим концерт дааж һарчана. Петр Ильич Чайковскийн нертә консеравторин медлд үүлджәх көгжмин школд сурчах ор һанцхн элч болж һарчана.
Эн асхн концерт хәлхәр ирсн әмтн Паганини үүдәсн “Каприсы”, Бахин бичсн “Ля минор” сонат, Верачини үүдәсн “Ларго” нертә үүдәврмүд сонсад чикнә хужран ханһав. Тер мет концертин йовудт арвн нәәмдгч — арвн йисдгч зун жилмүдин Европин нертә композитормудын болн өдгә цагин зокьялчнрин үүдәврмүд олна оньгт тусхагдв. Уйн наста өргн хуурчин билг-эрдмиг элстихн болн гиичнр байртаһар тосж, удан альхан ташв. Тер мет энүнә багшнр бас икәр байрлв.
Элст балһсна негдгч тойгта бичкдүдин көгжмин школын багш Татьяна Зайцеван келсәр, байрин өдрмүдт иим концерт олн улст сән белг болх. Эврәннь билгтә бичкдүдиг сонсад икәр байрлжана, эднә күцәмж ик бахмж болжана.
Классическ көгжм йириндән олн улст икәр таасгдж чикнә хужр ханһана. Нег үлү, уйн наста билгтнриг сонсхд йир тааста болна. Тегәд чигн иим конерцтд олн улс ирнә.
Эн залу күүнә келсәр, Москва балһснд сурчах нег һазра күүкиг дөннхәр ирв. Классическ көгжм сонсхар ирж. Эн күүкнә келсәр, эврән өргн хуурар нааддг дасжана. Тегәд иим концерт энүнд сән дамшлт болжана.
Келхд, иим концерт шин жилин түрүн концерт болв. Уйн наста билгт Элина Бядниева гертән амрад, цаарандан көгжмин сурһулян дасх.
Елена Алексенко, Максим Мятежный
