Көтчнрә района цуг селәдт газ орулгдв
Хальмг танһчд дәкәд нег район Көтнрә района цуг селәт газ ирв. Социальн ик чинртә төсв күцәхин төлә танһчин һардачнр цуг арһ-чидлән агсж шунв. Селәдт газ орулһна программ цаарандан күцәгджхәс иштә, ким түлән танһчин хамгин хол селәдт-поселкт ирв. Хойр минһн арвн һурвдгч жилин декабрин эклцәр газ арвн тавн-хөрн өрк-бүл бәәх бичкн селәдт орулгдв. Тер тоод Һоожур болн Шорва селәдин улс кимд түләһәр теткгджәнә. Энүнд селәнә эдл-ахун халхд эврә тәвцән орулжах малчнрин өрк-бүлмүд бәәршлжәнә. Селәнә улс ик байрта бәәнә. Юнгад гихлә, эдн кесг жилдән үвлин түлә хулдж авхин төлә дала мөнг һарһдг бәәсмн. Газ орулһна байрт ирсн гиичнриг эдн ду-бииһәр байрлж тосж авла.
Шин жилин байрин өмн өргнд Көтчнрә района Көглт селәнд кимд түлән ирв. Эн байрта йовдл нерәдгдсн керг-үүлдврт орлцсн Алексей Орлов Көглт селәнә цуг улсиг йөрәһәд, селәнә улст иим ик байр үүдәсн тосхачнрт ик ханлтан өргв. Эврәннь халхасн хойр минһн арвн хойрдгч — хойр минһн арвн һурвдгч жилмүдт газ орулһна программд Хальмг танһчд орхин төлә цуг керг-үүлдврмүд күцәсн танһчин һардачнрт газин компаня элч Сергей Ганзиков ханлтын үгмүдән нерәдв. Танһчин һардвр авсн цуг даалһвран күцәж чадв. Энүнә тускар Көтчнрә район администрацин толһач Валерий Очиров келв. Ода района цуг селәдт газ ирснь ик байрта зәнг гиж эн темдглв.
