Кенә нер проспект зүүх?
Йосн баатр эс гиж литературн герой? Хойрдгч болн нәәмдгч микрорайодын хоорнд бәәх проспектд хуучн неринь хәрү өгх селвг хотл балһсна элчнр орулж өгв. Йирдгч жилин чилгч күртл эн проспект күцц Георгиевск кавалер Петр Антонович Анацкийн нер зүүжәсмн. Ода эннь Остап Бендерин нертә проспект. Энүнд элстихн олар ирәд сул цагтан амрхдан дурта.
Эврәннь ун-тохминнь туужин тускар күн болһн медх зөвтә гиж доладгч классин сурһульч Ульяна Анацкая тоолжана. Эн жилин май сард эн күүкн Приютненск района далн тавдгч жилин өөнд нерәдгдсн Приютное селәнә уульнцин нердүдт баатрмудын нерн нертә марһанд орлцв. Энүнә тускар орс келнә багш Ирина Вдовенкоһас медж авч.
Приютное селәнә хойрдгч школын орс келнә болн литературин багш Ирина Вдовенко келсәр, бичкн төрскнә тууж медхин төлә, эврәннь өвкнриннь мартгдсн жирлһин халхсиг тодлж авх кергтә. Эднә селәнд Анацкийн нертә уульнц бәәнә. Эднә класст иим нер-ус сурһульч зүүнә. Эврәннь өвкнрин тууж медж авхд соньн болх гиһәд иим шинжлт кех селвг өгв.
Ульяна келсәр, марһана нәәрүлж бичлһн шинжлтын көдлмш болж хүврв. Петр Антонович Анацкий жирһлин хаалһин тускар соньн материалмуд бәәсн бәәж. Района, келн-улсин архивмудт, Амр Санана нертә библиотект көдлх кергтә болв. Ульяна элнцг аавнь орсин әәрмин подпрапоршик, Георгиевск кавалер, Әрәсән хүвсхлин өмн болсн дөрвн дәәнд орлцж. Приютное селәнд бәәх Анацкийн унг-тохма цуг улс шинжлтын көдлмшт орлцв.
Приютное селәнә хойрдгч школын сурһульч Ульяна Анацкая келсәр, селәнә тәвн-далн наста улс дунд сурлһ кеж. Тер мет энүнд Анацкийн уульнцин бәәрн улс болн йисдгч классин сурһульчнр орлцв. Анацкийн элгн-саднь бахмж кежәнә. Көдлмш бичхд күнд болв, зуг йир соньн.
Петр Анацкий нег минһн нәәмн зун далн йисдгч жилд Приютное селәнд төрсмн. Орсин-японя дәәнә орлцач, баатр-зөрмг кевәр дәәлдснә төләд Георгиевск кирсәр ачлгдв. Дәәнә хөөн Элст балһснд улусн заллтд көдлв. Нарта-делкән түрүн дәәнд бас баатр-зөрмг кеәвр дәәлдәд, күцц Георгиевск кавалер болв. Арвн доладгч жилд цаһан цергин отрядмудла ноолда кев. Арвн нәәмдгч жилин декабрь сард Теегин фронтын командирт шиидгдв. декабрин арвн тавнд сө Манц нуурин өөр болсн сүркә дәәлдәнд шав авад, әмнәсн хацһв. Зурһан үртә бәәж. Ода энүнә элгн-саднь Хальмгт болн хам-хоша бәәх регионмудт бәәнә. Давсн зун жилин найдгч жилмүдт Хальмгин АССР-ин Министрмүдин Хүүвин тогтаврар Элст балһсна дорд үзгин нег уульнцд күцц Георгиевск кавалер, гражданск дәәнә баатр, Теегин фронтын командир Петр Антонович Анацкийн нерн зүүлһгдв. Йирдгч жилмүдт энүг Остап Бендерин проспект гиж нерәддг болв. Одахн цугәрәсән олн-әмтнә фронтын элчнр эн уульнцд хуучн неринь хәрү өгх селвг орулж өгв.
Ульяна Анацкаян эк Ольга Анацкая келсәр, иим төр босхгджахнь байрта зәнг. Эдн өвкнь йоста баатр бәәж, баатр-зөрмг кевәр дәәлдв, энүнә нертә уульнц бәәх зөвтә.
Ольга Анацкаян тоолврла талдан чигн элгнсаднь зөвшәржәнә. Келхд, элстихн бас эн седәвриг дөннжәнә.
Приютное селәнә улс эврәннь баатр-зөрмг салдсар бахмж кежәнә. Ода долдадгч классин сурһульч Ульяна Анацкая Бичкн төрскн нертә танһчин марһанд белдвр кежәнә. Шинжлтын көдлмшән гүүдүлх саната. Нег үлү, Краснодарск крайд элгн-саднь олдв. Тедн бас шинжлтын көдлмш күцәжәнә. Эдн харһад, зәнгәрн хувалцад, При ютненск района Воробьевка селәнд одх зурата. Энд найдгч жилмүдт Петр Анацкийн бумб тосхгдсн билә.
Баира Петрова, Котина Валерий, Очра Сергей
