“Прорыв” форумин дииләчнр ачлгдв
“Прорыв” нертә форумин дииләчнр “Достояние республики” нертә мөрәһәр ачлгдв. Эннь физическ культурин, спортын, туризмин, государственн баһчудын политикин халхар күцәсн көдлмшин аш диглһн болв. Эн керг-үүлдвр Сочи балһснд болх үвлин олимпиадт болн хальмг танһчд олимпийск һал ирлһнд нерәдгдв.
Олна элчнрәс тогтсн шинжләчнрин хүүв хамгин сән баһчудыг арвн зурһан номинацар йилһв. Баг болһнд һурвн күн диилвр бәрхәр зүткв. Зәрм баһчуд спортын халхар ончрв, талдан көвүд-күүкд бизнесин болн үүдәлтин марһаст сән үзмж бәрв. Спискд түрүн болж "Федерация года" категорьт дииләч медгдв. Цугәрәсән болн танһчин кемжәнә хамгин олн марһа боксин федерацин олна организац бүрдәж давулв. Жилин тренерин нер Владимир Боктаев зүүв. Энүнә сурһульч греко-римск янзар бөк бәрлдлһнә Әрәсән чемпион Жанһр Бочаев хамгин сән спортсмена нер зүүсмн.
Жанһр Бочаевин келсәр, бөк бәрлдлһнә спортар арвн һурвн жилдән көдлжәнә. Эн жил Челябинск балһснд болсн Әрәсән чемпионатд диилвр бәрв. Цуг спортсменмүд олимпийск чемпиона нер зүүх саната, Европин болн нарта-делкән марһаст диилвр бәрх зурата. Эн бас иим күцл тәвжәнә. Ода марһаст сән белдвр кежәнә.
Командн спортын марһаст ончрсн "Динамо"ниицән элчнр диилвр бәрв. "Навигатор молодежи" нертә номинацд диилвр бәрхин төлә баһчуд сән нөкцлт күцәһәд, соньн төсвс яһж күцәгдсинь үзүлх зөвтә билә. Танһчин һурвн района специалистнр энүнд диилвр бәрхәр дөрлдв. Шинжләчнрин хүүвин гешүдин тоолврар “Достояние республики” мөрә Городовиковск РМО-н элч Лариса Мукубенова шүүж авв. Медицинск колледжин оютнрин праламент һурвн жил дарандан Диилврин Богиня Ники бәрмл көшә шүүж авхар зүткжәнә. Эн жил эн сурһулин көвүд-күүкд түрүн орм эзлв.
Сар-Герл Доржинован келсәр, эдн Элст балһснд болн танһчин райодт керг-үүлдврмүд бүрдәж давулв. Эн жил бүрдәсн керг тоод авгдв. Деля Катаеван келсәр, эднә көдлмш сән үзмжтә гиж жюри тоолв.
Форумин йовудт баһчуд эврәннь билг-эрдмән хоршасн дашлтан үзүлв, соньн программ күцәв гиж танһчин спортын, туризмин болн баһчудын политикин министр Александр Гедерим темдглв. Тер мет эрмдгтә көвүд-күүкд бас темдглсн зураһан күцәж чадх.
Александр Гедерим келсәр, шин эв-арһин утскар келхлә, паралимпийск спорт делгрүлх күцл тәвгджәнә. Эн жил хальмгин спортын туужд түрүн болж паралимпийск хүүв бүрдәгдв. Эрмдгтә улст спотран көдлх таал өгсн деерән, эдниг нарта-делкән марһаст орулх төр хаһлгджана.
Диилвр бәрсн баһчуд иргчдән кесг соньн зура темдглж авад, энүг бәәдл-жирһлд тохрарх саната. Цуг-арһ чидлән болн билг-эрдмән олзлда эдн тәвсн күцлдән эрк биш күрх гиж сангдна.
Ээнән Ольга, Котина Валерий
