Карачаевск сурһульчнрла хальмгин бичкдүд хәрлцә бәржәнә

Хальмг кел харсж харх кергтә. Төрскн келн нертә хотл балһсна хүүвин гешүд эн төриг һол төр гиж хаһлжана. Цаажн далдгч жилин һашута өөнд нерәдгдсн өргн сүүрт эднд Аршан поселкин болн Карачаевск балһсна сурһульчнр нөкд болхар шиидв.

Эндрк сүүр хальмг улсиг цаажла харһулсн далдгч жилин һашута өөнд нерәдгдв. Аршанск школ гиичнр тосж авхд сән белдвр кеж. Түрүләд музей үзүлв, “Улусы” нертә фильм олна оньгт тусхагдв. Сурһульчнр болн багшнр "Тангсг төрскндән" нертә литературн — көгжмин композиц белдж. Энүнд хальмгудыг төрскн һазраснь хол Сиврт нүүлһнә тускар келгджәнә.

Эн кемд Карачаевск балһсна һурвдгч тойгта школ һол залһлда бәрж сонсж хәләв. Иим кевәр карачаевцнрла харһлт кеснь бас учрта. Ноябрин хойрла уулын келн-улс цаажла харһсн далн жилин өөн темдглв. Тиигхд далн минһн карачаевцнр Казахстанд нүүлһсн билә. Школын багшнрин келсәр, Карачаево-Черкессьт эн һашута өөнд нерәдгдсн керг-үүлдврмүд бүрдәж давулгдв.

Харһлтд орлцсн төрскән харсгч дәәнә ветеран Владимир Джеваков эврәннь жирлин адрута хаалһин тускар гиичнрт келж өгв. Хальмгудыг тууврт йовулсн цагт йисн наста көвүн бәәж.

Ноябрь сард Элст балһснд Әрәсән Өмн үзгин болн Ар Кавказин цаажла харһсн келн-улсин номин дамшлтын конференц болсн билә. Элст балһсна администрацин толһачн дарук Галина Васькина келсәр, хам-хоша бәәх регионмудла залһлда батрулх кергтә, тегәд иим телевизионн тагт эрк биш кергтә.

Хойр ах-дү болгч келн-улсин хоорнд эрдм-сурһулин хойр учрежденьсин иим нөкцлт цаарандан делгрүлх шиидвр харһлтын ашт батлж авгдв.

Батан Санжирма, Ирчин Алексей