Эндр радион сән өдр

Хальмгин радио өдгә цагт Радио России программар эфирт һарчана. Энүг авторск канал гиж бүрдәв. Хальмгин радиоһар ахр зәнглһн болн цәәлһвр кегджәнә. Энүнд улсин хамгин ик чинртә төрмүдәр күүндвр кегднә.

Хальмгин түрүн профессиональн дуучин дуулсн дууг мана танһчин өрк-бүл болһнд сәәнәр меднә. Һучн доладгч жилд бичсн авсн дун ода күртл Хальмгин радион архивд бәәнә. Агчин улан бетг нертә дун тәвн доладгч жилд цугсоюзн радиоһар сонсж болв. Тиигхд хальмгуд киитн Сиврәс төрскн һазртан хәрж иржәх цаг билә. Хальмгуд эн ду сонсчкад, кесгнь ууляд бәәв. Радион звукорежиссер Савр Манджиевин келсәр, хальмгин нертә шүлгчнрин, зурачнрин болн талдан чигн искусствин үүлдәчнрин туск материалмуд хадһлж авгдв.

Хальмгин радион церглтин директор Валентина Бамбаеван ширә деер Венгряс ирсн бичг бәәнә. Радиосонсачин зәнглсәр, талдан орн-нутгт көдлмшин кергәр йовж йовад, бичкдүд орлцата хальмгин радион сонсхвр генткн хавлж авч. Радион директор Валентина Бамбаеван келсәр, Венгрин күн хальмгин сонсхврин тускар герчлһнә цаас сурв. Иим цаас энүнд йовулж. Удл уга Хальмгин радион сонсхврмудыг шуд эфирт сонсж болх.

Келхд, Венгрин күн соннсн сонсхвриг журналист Цаһан Шурунгова белдсн бәәж. Хальмгин редакцин дамшлтта зәнгчнр Хальмг танһчин толһачин Келни билг мөрән болн Улан Зала танһчин марһана лауреатнр болв. Байрта Коклаева энд зурһан жилдән көдлжәнә. Радиожурналистын соньн эрдмин тускар кесгтән келж чадх. Шүүврин марһана хөөн энд ирж көдлв. Марһанд бичсн көдлмшән ода күртл сәәнәр тодлна. Тиигхд хальмг улсин Цаһан Сарин байрин тускар сонсхвр белдж. Эн көдлмшиг зхәрмнь буулв, зәрмнь шалһв. Баһ наста журналистын тоолврар, радион зәнгчд енгс тодрха холл кергтә. Тиигхлә келсн үгмүд медгднә.

Радио зәнгч Байрта Коклаеван келсәр, радиозәнгч хооларн әәһин айлһ кех зөвтә. Энүгәрн радион көдлмш таасгдна. Дурта эрдмдән цуг цаган өгх дурн күрнә.

Танһчин сонсачнр өдр болһн шин зәнгсин һарц, литературн болн бичкдүдин төлә белдсн сонсхврмуд сонсна. Эфирт һарсн материалмудын тускар танһчин әмтн ухан-тоолврарн хувалцж, редакцд жиннүлнә, бичгүд бичнә. Тер тоод Элст балһсна бәәрн күн Тамара Натырова.

Тамара Натырован келсәр, радиоюар классическ көгжм сонсх дурн күрнә. Тер мет оюни босхмжин туск сонсхврмуд соньн болна. Хальмгин радио эфирт һардг цаг меднә. Тегәд оньдин радио сонсна.

Хальмгин радио өдр болһн хойр частан эфирт һарна. Түрүн хәләцд эннь бичкн кемжән. Энүг белдхин төлә журналистнр, режиссермуд, редактормуд ут-тоодан арвн тавн күн чидлән нөөлго көдлжәнә. «Доброе утро», «Калмыкия», «Пульс», «Время» болн талдан чигн радиопрограммсиг көдлмшин өдрмүдт болн амрлһна өдрмүдт сонсж болх.

Ээнән Ольга, Хавтхна Анатолий