Хаалһс яслһна төлә танчһин бюджет баһ мөнг йилһж өгчәнә
Эндр Хальмг танһчин правительствин президиумин сүүр болв. Энүнд танһчин хаалһсин му бәәдлин тускар келгдв. Хаалһс яслһна төлә танһчин бюджетас йилһж өггджәх мөнгн күртжәхш. Асфальтн хаалһин нег дууна ясхин төлә зурһан сай арслнг кергтә. Хаалһс му болад, зеткртә йовдлмуд олар учржана.
Хальмг танһчин хаалһс шинрүлж яслһна төлә региональн бюджетас йилһж өггджәх мөнгн күртжәхш. Энүнә тускар эврәннь докладтан танһчин тосхлтын, көлгн-күчнә болн хаалһин эдл-ахун министр Кирилл Ботов зәнглв. Энүнә келсәр, нег дууна асфалтн хаалһ шинрүлж яслһна төлә зурһан сай арслнг кергтә, капитальн ясвр кехин төлә болхла хөрн сай арслнг һарх. Тосхлтын министр Кирилл Ботовин келсәр, хаалһс яслһна төлә өгчәх дөчн сай арслнг баһ. Ода хаалһс цаглань эс ясхла, эдн цаарандан эвдрәд му бәәәдлд тусх. Хаалһст зеткртә йовдлмудын то өсх.
Ода мана танһчд хаалһс ясдг тавн заллт көдлжәнә. Энд бәәх техникин йирн процентнь хуучрад эвдрв. Сарпинск хаалһин заллтин һардач Максим Эренценовин келсәр, энүнә һарджах предприять федеральн хаалһин зун арвн долан дууна болн танһчин чинртә һурвн зун дууна хәләж ясжана. Энүнә төлә йилһж өгчәх мөнгн икәр йилһрнә. Максим Эренценовин келсәр, федеральн бюджетас нег дууна хаалһ ясхин төлә һурвн зун минһн арслнг ирнә, танһчин хазнас болхла хөрн дөрчн минһн арслнг өггднә. Тегәд долан жилдән региональн хаалһс ясгджахш.
Танһчин хаалһс му бәәдлд тусснас көлтә зеткртә йовдлмудын тө жил ирвәс өсәд йовна. Танһчин ГИБДД-н заллтин ахлачин дарук Андрей Сюкеевин келсәр, давсн жилин эргцд танһчин хаалһст йирн зеткртә йовдл учрв. Энүнә ашт зун нәәмн күн әмнәсн хаһцв. Хамгин иолра зеткртә йовдл учрдг дөчн һурвн орм Госавтоинспекцин көдләчнр илткв. Эднәс иим арвн дөрвн орм Элст балһснд бәәнә.
Хамгин олар хаалһст зеткртә йовдлмуд Ленина нертә уульнцд учрна. Жанһрин нертә улуьнцин керчлһнд, негдгч микрорайона төөлгт, Очра Номтын нертә уульнцд әмтн йовдг һазрт, Чкаловин болн Губаревичин уульннцсин керчлһнд хамгин олн зеткртә йовдл һарна. Тер мет зурһадгч микрорайонд Сухэ-Баатрин нертә уульнцд һурвдгч микрорайона Чонкушовин нертә проспектд йовхд әәмшгтә болна. Андрей Сюкеевин келсәр, ясврин көдлмш күцәхин төлә мөнгн баһар иржәнә. Энүнәс көлтә хаалһс эвдржәнә. Цаһан Амн селәнд күрдг хаалһ хуучрад му бәәдлд тусв.
Хальмг танһчд автомобильн хаалһс шинрүлж яслһна программ ьелдх даалһвр тосхлтын болн хаалһин министерствд правительствин ахлач Игорь Зотов өгв. Ода болхла хаалһст ясвр кехин төлә зун сай арслнг кергтә.
Арстана Светлана, Хавтхна Анатолий
