Бичкдүдин цутхлнгд көвүд-күүкд школд белдвр кежәнә
Элст балһсна негдгч тойгта искусствин бичкдүдин школын медлд "Алтн булг" нертә эстетическ делгрлтин цутхлнг секгдв. Шин цутхлнгд бичкн көвүд-күүкд билг-эрдмән дергрүлхин төлә цуг кергтә таал бүрдәгдв. Нааран ирсн бичкдүд дурта эрдмән шүүж авад, олз-туста кичәлд орлцж чаджана.
Саша Дорджиев шатр наадг эрдм дасж авхар шиидв. Иим селвг энүнд эцкнь өгсн бәәж. Ода шатрин секд орсндан ик байрта бәәнә. Эднә тренер Михаил Дмитриевич Голося кичәл болһниг йир соньн нааднд хүврүлнә.
Саша Дорджиевин келсәр, жанһрта болн күнд нааднд дурлж наадна. Тегәд нааран ирж. Шатр таасгджана.
Иим күнд шатр наадыг соньн кеәвр дасжах багшдан көвүд-күүкд ик ханлтан өргжәнә. Нарн Менкнасуновин келсәр, тренер күнд наадыг амр кевәр дасхжана. Сән багш бәәж.
Михаил Владимировичин тоолврар, бичкдүдин делгрлтд шатр йир сән нилчән күргнә. Тренер Михаил Голося келсәр, иим бичкн цагасн авн сән белдвр кесн көвүд-күүкд иргчдән спортын халхар сән үзмж бәрнә. Эдн мана иргч болн ицл болжана. Шатр сурһуль дасхд сән нилчән күргнә. Школд предметмүд дасхд шатр наадг улст амр болна.
Саша Дорджиевин эцкнь иим тренер харһснд бай ик байрта бәәнә. Элвг Дорджиевин келсәр, тренер Михаил Голося амр кевәр бичкдүдт шатр нааддг дасхна гиж сонсж. Энүнд бичкдүд наадар дамжулж шатр нааддг дасна. Эннь таасгдна.
Тер мет Алтн булг нертә цутхлнгд китд кел даслһна баг бәәнә, изостудь көдлжәнә. Энүг байн дамшлтта багш Надежда Ивановна Галушкина һарджана. Эстетическ делгрлтин багд бас ик дамшлтта болн гүн медрлтә багшнр Татьяна Владимировна Рвачева болн Галина Иванован Михайличенко көдлжәнә. Бичкн көвүд-күүкдиг эдн школд сән кевәр белджәнә. Ирина Горяшкиеван келсәр, иим багшнр көдлмштән шин эв-арһ олзлна, бичкдүдлә эдн наадад, күүнднә. Кичәлд күүндсн деерән, завсрин кемд чигн эдн күүндхдән дурта. Бичкдүд цугтан байрлад, инәһәд, сурһулян сәәнәр дасжана. Иим сурһуль олз-туста болжана. Наталья Сергеева темдглсәр, Алтн булг нертә цутхлнг секснь йир сән керг. Бичкдүд школд сәәнәр белдж чаджана.
Шин секгдсн бичкдүдин цутхлнг школд көвүд-күүкд белдлһнд эк-эцкнрт сән дөнгән күргжәхнь лавта.
Шаран Баира, Настан Сергей
