Яшалтинск района больницин эмчнрлә премьер Игорь Зотов күүндв
Эн жиләс авн танһчин эмнүлин учрежденьс нег каналар мөнгәр теткгдхмн. Шин систем ямаран олз-туста болх? Энүнә тускар танһчин правительствин ахлач Игорь Зотов Яшалтинск района больницин коллективла күүндв. Урднь эмнүлин учрежденьс олн-зүсн халхас мөнг авдг бәәсн болхла, ода эдн зуг нег халхас — медицинск даатхлһна сангас мөнгәр теткгдхмн.
Урднь эмнүлин учрежденьс олн-зүсн халхас мөнгәр теткгджәлә. Ода болхла эдн зуг нег халхас медицинск даатхлһна территориальн сангас мөнг авх. Болв альдас мөнгн орж ирдгнь әмтнд керг уга. Хамгин һол төрнь — медицинск туслмж сән чинртә болн олз-туста болх зөвтә. Энүнә төлә Яшлатинск района больниц дик көдлмш кегдв. Ода энд цуг кергтә эмчнр бәәнә. Больницин ах эмч Юрий Кикеновин келсәр, специалистин хәләврт гемтә улс дор ормдан орж чаджана. Өдгә цагт района больницд "Земский доктор" программар арвн дөрвн эмч көдлжәнә. Эднд эн программар нежәһәд сай арслнг мөнгн өггдв. Ут-тоодан энд көдлх саната улсин то найн күүнд күрв.
Рентгенолог Айна Орусова болн энүнә аваль хирург Евгений марһанд орлцад, энд көдлх зөв авцхав. Федеральн программин дөнгәр баһ наста өрк-бүл бәәдг герәр теткгдв. Айна Орусован келсәр, ода эмчнрт эврәннь гер хулдж авх мөнг олж авх күнд. Федеральн программар бәәдг гер өггджәнә.
Ода Әрәсән закаһар гемтә улс эврән бйинь специалистиг шүүж авад, бийән эмнүлнә. Района больницин материальн-техническ ул батржана. Энд өдгә цагин некврлә ирлцәтә оборудовань углж тәвгдв. Капитальн ясврин хөөн эмнүлин учрежденя кабинетмуд болн палатмуд таньгдшгоһар шинрүлж ясгдсна тускар Яшалтинск района больницд одсн кемд танһчин правительствин ахлач Игорь Зотов темдглв.
Көвүн үрн эс гиж күүкн үрн төрхинь медж чадхит гиж премьер Игорь Зотовин сурв. Зуг нег эс гиж хйор дәкж эндү һарв гиж медсестра келнә. Ах эмч Юрий Кикеновин келсәр, района больницд Ростовск областин бәәрн әмтн олар ирж бийән эмнүлнә. Энүнәс иштә мөнг олх арһ учрв. Талын һазрас ирсн улсас немр мөнгн иржәнә. Давсн жилин эргцд немр нег сай арслнг шингәж авч чадвидн.
Бичкдүдин болн хирургическ әнгүдт ода күртл тосхлтын көдлмш күцәгджәнә. Района эмнүлин учрежденя улд бальчг олзлж эмнүл кедг шишлнг цутхлнг секх зура бәәнә. Тиигхлә арсна гемәр гемнжәх болн көл-һарнь зовадг улсиг энд сәәнәр эмнүлж болжана. Энүнәс иштә больницин хоршах оруһин мөнгнә кемжән күргсн медицинск туслмжин тооһас болн чинрәс медгдх. Гемтә улсин то ик болхла, ору ик болх. Поликлиникин болн больницин ах эмчнрт шин систем ик арһ өгчәнә. Нег каналар мөнгәр тексн цагт больницин ах эмчнр эрүл-менд харлһна министерствд одад, мөнг сурдг арһ уга болх. Эднә һол кергнь — йилһж өгсн мөнгиг олз-тустаһар олзлһн болжана. Шин системин тускар больницд көдлжәх эмчнр эврә ухан-тоолврта бәәнә. Яшалтинск района больницин ах эмч Юрий Кикеновин келсәр, ода коммунальн туслжмин мөнг өгхд күнд болжана. Бензина мөнгн, хуучн сооруженьс ясх мөнгн кергтә. Коммунальн туслмжин мөнгн дарунь олзлгдна. Эн туст бәәдл чиклх кергтә. Ик һаруг кемжәлх санатавидн.
Кикеновин тоолврар, шин системин тускар жил төгсхлә келж болх. Эмнүлин учрежденя экономическ халхиг сәәнәр делгрүлхлә, эдн уралан девшх.
Ээнән Ольга, Очра Сергей
