Эндр Александр Пушкин санлын өдр
Эндр дигтә зун далн тавн жил хооран орсин алдр шүлгч Александр Пушкин сәәһән хәәсмн. Эн өдр Әрәсәд, тер тоод мана танһчд нертә бичәчин санлд нерәдгдсн олн керг — үүлдврмүд болв. Пушкина нер зүүжәх дегтрин сангин көдләчнр соньн бичәчин тускар һәәхүл бүрдәв.
Орсин бичәч Алесандр Пушкина бичсн үүдәрмүдиг күн болһн меднә. Бичкн көвүд күүкд энүнә бичсн ахр шүлгүдиг чеежәр дасна.
Школд сурһуль сурч йовсн цагт баһчуд энүнә бичсн үүдәврмүдлә таньлдна. Эн өдр цуг сурһулин заведеньст энүнә санлд нерәдсн кесг керг үүлдврмүд давулна. Пушкина нер зүүжәх дегтрин сангин көдләчнр эврәннь умшачнртан бичәчин тускар соньн стенд белдв. Манжин Светлана бичкн цагасн авн алдр бичәчин бичсн туульмудт болн шүлгүдт әвр дурта.
Жил болһн иим керг — үүлдврт олн улс ирж Александр Пушкина тускар соньн медрл авна. Дегтрин сангд олн жилдән көдлжәх улс йир седклтә, цаһан саната, эднә жалвнь бичкн болв чигн эдн дурта эрдмән хайлго, эврәннь умшачнрин төлә өдр болһн көдлнә.
Алдр бичәч Пушкина санлд нерәдгдсн керг үүлдврт күн болһн орлцж чаджана.
Аджин Светлана, Колдан Церн
