Артезиан селәнд удл уга спортын клуб көдлх

Хар һазра района Артезиан селәнд удл уга спортын клуб көдлх. Ода тенд шишлнг гер яслһна көдлмш төгсжәнә. Бәәрн поселкин баһчуд иим байрта тосхлтыг тенкән уга гидгәр күләжәнә. Тосхлтын көдлмшиг селәнә тосхачнр эврәннь чидләрн күцәжәнә. Нарма Очировин келсәр, сар хооран иим көдлмш эклсмн. Эн седвәриг артезианцнр дөннв. Тегәд күн болһн эврә тәвцән орулхар седв. Нарма Очировин келсәр, ода сул цагта әмтн нааран ирәд нөкд болжана. Роман Шурхчиев ода Элст балһснд бәәршлжәсн бийнь, клубын гер яслһнд бас дөн болжана. Арвн жил хооран бәәрн күн Александр Городоваевин седвәрәр Артезианд спортын зал секгдв. Ода хуучн гер ясхин төлә бәәрн арһлачнр, заһсчнр болн селәнә улс ик нөкд болжана. Иим спортын клуб секлһнд танһчин МВД-н һардач Баатр Гиндеев болн селәнә полицин нуктын ахлач Савр Дякиев ик дөн күргв. Онц темдглхд, бәәрн Эрктн клубд Әрәсән командын гешүд Санл болн Мингиян Семеновихн бөк бәрлддг дассмн. Тегәд бәәрн көвүд эднәс үлгүр-үзмж авх саната. Шин клуб февралин чилгчәр секгдх.