Әмтн йовдг хаалһс удл уга ясрх

Әмтн йовдг хаалһ улм сән болх. Иим бәәрнд кегдсн цаһан татасиг талдан өнгәр ширдх зура бәәнә, кегдмл герл углж тәвх, хаалһсин темдгүдт болхла, светодиодн герл олзлгдх зөвтә. Иим шинрлт Элст балһснд орулгдхий аль угай?

Ода элстихн болн гиичнр хаалһ керчәд һархларн адһад гүүнә. Эннь бас учрта, хаалһд дегд олн машид гүүжәнә. Иим таалд машинд дәвргдх әәмшг бәәнә. Үлгүрнь, Элст балһсна цутхлнгд өдр-сө уга гилтә хаалһ керчәд һархд әәмшгтә. Ода хотл балсһна хаалһст шишлнг цаһан татасн болн темдгүд үзгдхш. Тегәд чигн зәрм маши залачнр иим һазрт арһул йовхш. Олн жилдән жолач болж көдлжәх Владимир Чурюмовин келсәр, Элст балһсна хаалһс му бәәдлд тусв. Болв зәрмдән йовһн әмтн бас хаалһсин зокал эвднә. Нег үлү, сокту әмтн хаалһ давж һархла, жолачнрт әәмшгтә болна. Тегәд чигн иим бәәдл чиклх кергтә. Энүнәс иштә Әрәсән ГИББД иим сән седвәр татсмн. Иим шинрлт орулхин тускар олн улс тоолврарн хувалцхин төлә эн ведомств эврәннь сайтд бичв. Иим дамшлт ода Әрәсән ик балһсдт орулгдсн бәәнә. Элст балһснд болхла шин зака бәәдл-жирһлд тохрах кергтә. Энүнә төлә цаг болн мөнгн кергтә. Шин закан батлж авгдад күцәгдхлә, әмтн хаалһар әәмшг угаһар йовхнь лавта. Онц келхд, хаалһд кегдмл боомтгин эв-арһ кехин төлә хйор зун минһн арслнг кергтә. Тегәд Элст балһснд әмтн хаалһ давж һардг һазр дор болн деер иим тагт бәрхд жанһрта болсн деерән, йир үнтә болх. Ода Элст балһсна хазнд иим мөнгн уга. Тер бийнь эн төриг эрк биш хаһлх кергтә болжана.

Бевина Мергн, Жамбин Дмитрий