Дежурн-диспетчерск церглт көдлжәнә
Усна сурвлжна турва эвдрхлә, аюл болхла эс гиж зүркн өвдхлә 112 эс гиж 911 телефоһар жиннүләд дөн авч болх. Элст балһснд дежурн-диспетчерск негдсн церглт цаарандан көдлжәнә. Специалистнр өдр-сө уга көдләд, хотл балһсна бач чинртә болн оперативн церглтслә хамдан үүлджәнә.
Түүмр шатсн аюл, хаалһд зеткртә йовдл, газ һарсн әәмшгтә йовдл. Иим бачм чинртә йовдлмуд күн болһнд учрхмн. Иим кемд икәр үүмлго, тер дарунь специалистнриг дуудж авх кергтә. Давсн жилин ноябрь сарин нег шинәс авн Элст балһснд түрүн болж 112 нертә систем экләд көдлв. Түрүн сард найн күн жиннүлв. Цаг ирвәс им улсин то өсәд йовна. Эн жилин март сард церглтд хойр минһн күн жиннүләд, дөн сурв. Эднәс ик зунь жилишн-коммунальн эдл-ахун көдлмшин, бачм чинртә медицинск дөн күрглһнә болн полциин көдләчнриг дуудж авлһна тускар жиннүлв.
Элст балһсна дежурн-диспетчерск церглтин ахлач Александр Команджаевин келсәр, мана церглт зәнглһ авна, энүг эд-бод кеһәд, ахр болзгт кергтә церглтд, организацд зәнг тархана. Жиннүлсн күүнә төриг күцц хаһлх зөвтә.
Ода церглтд арвн хойр диспетчер көдлжәнә. Өдр болһн һурвн күн көдлнә, эднәс негнь психолог. Мана үүдәгч баг ирсн кемд нааран арвн күн жиннүлв. 112 систем ахр болзгт әмт харсж авлһна дөн күргнә, бачи чинртә йовдлмудт нөкд болж чадх. Церглтин диспетчер Макисм Бембеевин келсәр, дундлад өдр болһн тәвн-найн күн жиннүлж дөн сурна.
Элст балһсна дежурн-диспетчерск церглтин көдләч Максим Бембеевин келсәр, нег дәкж Сарпинск районд автобус эвдрснә тускар жиннүлв. Зәнгиг ахр болзгт ГИБДД-н көдләчнрт өгв. Тедн улсиг талдан автобуст суулһад йовулж. Тиигхд һаза хөрн градус киитн билә. Зәрмдән бичкдүд жиннүлнә. Эцкнь экән цокжах туск зәнг ирнә. Ик баһ уга күн болһнас зәнг авх зөвтәвидн.
112 телефоһар өдр-сө уга жиннүлж болх. онц темдглхд, 112 телефоһар ямаран чигн телефонас жиннүлж болх, герин эс гиж мобильн телефонас зәнг өгч болх. Жиннүлсн күн мөнг өгшго, нег үлү сим карт уга телефонас бас жиннүлж болжана. Элст балһсна әмтн иим церглтин тускар медсн бийнь, энүг олзлад уга. Иим церглтин тускар меднә, зуг нааран жиннүләд уга гиж эн күн келнә. Иим церглт кергтә, әмтнд олн-зүсн хурц төр харһна гиж эн темдглв. Иим церглт бәәхнь меднә, кергтә болхла жиннүлх санатав гиж эн күн келнә. Иим церглт кергтә, нег үлү кеер машиһар йовж йовхла кергтә болна гиж эн келв.
Күн бәәдлд туссн әмтн иим церглт ик дөн болх. Ода дежурн-диспетчерск негдсн церглт Элст балһснд болн цуг райодт көдлжәнә.
Ээнән Делгр, Котина Валерий
