Крыловин баснь хальмг келнд орчулгдв
Амр Санана нертә келн-улсин библиотект Эрдни Канкаевин шин дегтрин презентац болв. Энүнд зокьялч орчулсн Крыловин баснь хальмг келәр барлгдв. Шин дегтрин презентац бичкдүдин дегтрин нарта-делкән өдрлә ирлцүлж кегдв.
Шогта-инәдтә болн гүн учр-утхта орсин нертә бичәч Крыловин тежг шүлгүд ода хальмг келнд орчулгдв. Урднь Крыловин басниг хальмг келнд мана танһчин шүлгчнр орчулсн билә. Болв бүкл дегтр орчулхд амр биш болв. Энүнә төлә дала цаг болн чидл кергтә.
Хальмг келнд орчулгдсн тежг шүлгүдиг артистнр йилһән сән кевәр умшж өгв. Эннь бас учрта. Шепкина нертә театральн училишд сурчах хальмгин студин оютнрт хальмг келәр баснь умшх кергтә Болв. Тегәд Крыловин гүн утхта үүдәврмүдин Эрдни Канкаев хальмг келнд орчулв. Эн көдлмш йир нәрн болсн деерән, күнд болв. Ода болхла баһчуд энүнә орчулсн басниг дурлж умшжана.
Шин дегтрт орсн тежг шүлгүд уул хальмг келәр орчулгдв. Эннь зуг Крыловин үүдәврмүдәс байжсн уга. Эрдни Канкаев эврәннь орчулсн басньд кезәнә озлгдж йовсн хальмг үгмүд олзлв. Иим кевәр төрскн келнә чинриг өөдлүлж, баһчуд хальмг келәр соньмсх күцл орчулач тәвж көдлв. Эрдни Патаевич эврәннь көдлмшин тускар дала үг келхдән дурлхш.
Шин дегтрин түрүн үзүлвр бичкдүдин дегтрин нарта-делкән өдрин өмн өргнд болв. Бичкдүдин төлә бичсн дегтрмүд дорас өсж йовх баһчудт чик сурһмж өгчәнә.
Елена Алексенко, Ирчин Алексей
