Элстин хаалһс шинрүлж ясхин төлә мөнгн күртжәхш
Элст балһсна хаалһс шинрүлж ясхин төлә ут-тоодан далн сай арслнг кергтә. Иим мөнгн ода хотл балһсна хазнд уга. Хаалһст нүк бөглдг жил болһн кедг ясврт чин мөнгн күртжәхш.
Элст балһсна цутхлнгд Ленина нертә уульнцд хаалһст иим нүк оньдин үзж болх. Эн цутхлнг уульнцар хамгин олн машин гүүлгнә. Удл уга энд ясврин көдлмш эклхмн. Болв урдк кевәр хаалһд хоосн халас тәвәд, нүк боглх. Иим бәәдл жил болһн намрин болн хаврин кемд хотл балһсна һол хаалһд тогтна. Онц келхд, хаалһс шингрүлж яслһна төлә жил болһн һучн сай арслнг кергтә болна. Йосндан болхла энүнә төлә зуг долан сай арслнг олзлгдна. Элст балһсна администрацин эдл-ахун заллтин ах специалист Дмитрий Шолоховин келсәр, жил болһн генткн киитрәд, дарунь хур орснас көлтә хаалһс му бәәдл һарна. Ода машиж олра гүүлгдг уульнцсд Ленина, Жанһрин болн Буденна нертә уульнцсд ясврин көдлмш кегдхмн.
Ода Элст балһснд хамгин му бәәдлд Демьяновская нертә уульнц болн иим нертә переулок тусв. Гүн ик нүкиг машид әрә гиж һатлж һарчана. Энүнд эрк биш капитальн ясвр кех кергтә. Болв специалистнрин келсәр, федеральн мөнгн угаһар иим ик көдлмшиг зуг хотл балһсна администрац эврән күцәж чадшго. Онц темдглхд, өдгә цагт Элстин цуг хаалһсас найн процентнь эдлврин болзгас давж одв.
Иим бәәдлин тускар хаалһин эдл-ахун көдләчнр кесг жил хооран келсн билә. Николай Кайдучик һучн жилдән маши залжана. Өдр болһн гилтә Буденна нертә уульнцар йовх кергтә болна. Эн хаалһд бәәх нүкмүдиг зуг дамшлтта жолачнр давж һарч чадх. Николай Кайдучикин келсәр, иим му хаалһас көлтә зеткртә йовдлмуд дару — дарунь учрна. Иим нүк давж һархд йир ховлнгта болна. Зуг дамшлтта жолачнр иим таалд йовж чадна. Ода болхла дамшлт уга маши залачнр дала.
Кедү ясвр кесн бийнь, хаалһин бәәдл ясржахш гиж жолач Станислав келнә. Шинрүлгдсн хаалһ тер дарунь эвдрж одна, Тегәд олн нүкнд тусад, машиһан хамхлжана. Маши залачнрин келсәр, ясврин көдлмш кехин төлә мөнгн уга гиж балһсна һардачнр оньдин гөрдж һарна. Зуг машиһан хамхлхла альдас мөнг авч ясвр кехин утскар күн ухалжахш. Эн жолачин келсәр, автомобилин мотор, төгәс болн талдан чигн әнгс хамхрна. Ясвр кехин төлә кесг минһн арлснг һарна. Хур цасн орхла хаалһд нүкн үзгдхш. Тегәд машиһар йовж йовад гүн нүкнд тусхнь юмн уга. Хаалһсиг цаглань сәәнәр ясх кергтә гиж жолач келнә.
Тер саамд Элстин хаалһст ик аца зөөсн машид гүүлгәд, хаалһ хамхлжана. Эн жил хойр минһн һурвн зун дөрвлжн метр хаалһ болн әмтн йовдг хаалһ ясхин төлә дөрвн сай арслнг йилһж өггдх. Эннь давсн жиләс зөвәр баһ болжана. Тер саамд му хаалһас көлтә зеткртә йовдлмудын то жил ирвәс өсәд йовна.
Ээнән Ольга, Бадмаран Владислав
