Багшнрин төлә шин гер тосхгджана

Элст балһснд багшнрин төлә шин гер тосхгджана. Энд патьрмудын үн талдан тосхлтын компаняс зөвәр кимд. Тавн давхрта гер нурһлж белн болв. Октябрь сард нааран әмтн нүүж орх. Эднә тоод багшнр, эмчнр болн талдан чигн эрдмин элчнр йовна.

Эврәннь шин патьран хәләхәр хальмг келнә багш Баснг Боваев көвүнтәһән ирв. Энүнә келсәр, бичкдүд шин бүүртән орхар ик кезәнәс авн тенкән уга гидгәр күләжәнә. Ода олн үртә өрк-бүл обшежитин нег хорад бәәршлжәнә. Бәәдг гер хулдж авхин төлә Боваевихна өрк-бүл экин мөнг олзлв, деернь ипотечн кредит банкас авч. Аштнь һурвн хората патьр негсай һурвн зун тәвн минһн арслнг күрв.

Шин тосхгджах герт патьрмудын үн талдан тосхлтын компаняс зөвәр кимд болж һарчана. Үлгүрүнь, тавдгч давхрт патьр авсн улс нег дөрвлжн метрт арвн йисн минһн арслнг өгв, дундлад нег дөрвлжн метрнь хөрн негн минһн арслнг күрчәнә. Хотл балһсна һардвр нааран электрокүч, газ бол ус орулхин төлә мөнг йилһж өгв. Тер мет бәәрн бюджетас герин эргндк аһу кеерүлгдх, бичкдүдин плошадк тосхгдх.

Тавн давхрат шин гериг октябрь сард эдлврт орулх зура бәәнә. Ода энд герин ора бәрлһн төгсжәнә, подьездмудт шалдарин болн ши рдлһнә көдлмш кегджәнә. Келхд, олн давхрат егрин өөр дәкәд нег шин гер бәргдх. Энүг дару ксард эклх санан бәәнә. Әмтн бәәдг гер авх чеерүдт аврн нәәмдгч школын багшнр Ирина Анбушинова болн Надежда Черкасова зогсжана. Эн күүкд күүнә келсәр, иим программин тускар Әрәсән Президент Владимир Путин келсн цагт иткл ирв. Профсоюзмуд, хотл балһсна һардвр болн тосхлтын организацс энүг дөннв. ике гидгәр байрлв. Эн программд орсндан ик байрта бәәнә. Нег хората патьр хәләв. Хора зөвәр ик, таасгдв. Лоджий бәәнә. Кухнин аһуг талдан халхар олзлж болх гиж эн күүкд күн келнә.

Багшнрин тоолврар, иим кимд патьрмуд бәрсн йовдл әрәсән багшин эрдмин чинр өөдлүлһнд түүрн ишкдл болжана. Эднә ик зунь кезәнәс авн үүмүлжәх төрән ода ирж хаһлж чадх. Онц келхд, дәәнә ветеранмудын төлә шин герт хйор патьр йилһж өгчәнә. Энүг ветеранмуд федеарльн программар өнгхр авх зөвтә.

Ээнән Ольга, Хулхачин Николай