“Алеко” опер Элстд түрүн болж үзүлгдх
“Алеко” опер Элст балһснд түрүн болж үзүлгдх. Энүнд хальмгин нертә дуучнр болн Волгоградын артистнр орлцжана. Александр Пушкина бичсн туужар тәвсн оперт дурна тускар келгджәнә. Энүг хәләж сонсхд соньн болх зөвтә. Орсин шүлгчин үүдәвриг көгжмд алдр композитор, пианист Сергей Рахманинов нәәрүлж орулсмн.
Александр Пушкина Цыганы поэмар үүдәсн Сергей Рахманиновин “Алеко” опер Московск консерваторьт энүнә дипломн көдлмш болж һарв. Ода Хальмгин хәләһәчнр Бессарабин теегт хйор зун жил хооран учрсн туужин тускар медж авх арһ учрв. Циигн улсин зүркнә нуувч медж авхд оперин сюжет иим арһ өгчәнә. Хальмгин искусствин ачта үүлдәч Мергн Настиновин келсәр, нүүдг цииһнә таборин биилжәх би, көгжм опериг кеерүлжәнә.
Оперин һол дүрмүдин келсәр, эн үүдәвр арвн йисдгч зун жилмүдт бичгдсн бийнь, энүнд босхгджах төрмүд өдгә цагт бас ик чинр зүүжәнә. Баһ наста Алекон дүриг Волгоградск областин государственн мөрән лауреат Роман Байлов нааджана. Нас зүүсн Алекон дүриг болхла Царицынская опера Волгоградск государственн театрин дууч Максим Орел дуулжана. Актермудын билг-эрмд болн енсг сәәхн көгжм улсин зүрк авлх. Алекон амр биш тууж сурһулин чинр зүүжәнә.
Хальмгин искусствин ачта үүлдәч Иергн Настиновин келсәр, кесг жилдән Алеко таборла хамдан нүүһәд йовна. Энд Земфира күүкнд дуран өгнә. Зуг хөөннь талдан кү1н ирәд, Земфираг дурлна. Аштнь Алеко һанцхарн үлднә.
Уйн наста цииһн күүнә дүр наадхин төлә Хальмгин государственн филармоня дууч Эвелина Лиджиевад үрвр кеж. Энүнә келсәр, иим дүр наадхд амр биш болв. Оперин сюжетнь таасгдв. Земфира күүкн Алекод дуран өгнә. Болв удл уга энүнә дурна заль унтрна. Бичкн күүкән үлдәчкәд, Земфира сәәхлә талдан күүнд одна.
Хальмгин государственн филармоня дууч Эвелина Лиджиеван келсәр, нааджах дүр йир инәдтә. Энүнә үзлсн дүр дуучин зангла ирлцжәхш. Тер бийнь цииһн күүнә дүриг сәәнәр үзүлхәр зүткжәнә.
Земфиран эцкин дүриг Хальмг танһчин ачта артист Игорь Лазарев үзүлжәнә. Дууч гастролян хайчкад, Элст балһснд ирәд, “Алеко” оперт дуулхар шиидв. Энүнд үзүлгджәх тууж энүнә баһ дүүвр нас болн дурна тууж тодлулв. Энүнә авальнь зуг нег жилдән хамдан бәәж.
Хальмг танһчин ачта артист Игорь Лазаревин келсәр, иим дүр энүнд өөрхн болв. Бичкн дүр үзүлхд соньн болв. Эцкнь гүн уха тунһаж, жирлһин дамшлтарн хувалцна. Баһ дүүвр насндан дурлж йовсн цаган үзүлжәнә.
Шин оперт государственн хор болн хальмгин симфоническ оркестр орлцжана. “Алеко” оперин түрүн үзүлвр декабрин нег шинд болх.
Ээнән Ольга, Хулхачин Николай
