Алина Макаренко спортын үүлдврән төгсәв

Ик спортын үүлдврән төгсх шиидвр авв. Хальмгин художественн гимнастикин сурһульч Алина Макаренко спортан хайхин тускар зәнглв. Сингапурт болсн уйн наста спортсменмүдин наадан дииләч, нарта-делкән болн Европин чемпионк, Лондона олимпийск чемпионк иим шиидвр хойр сар хооран авч.

Алина Макаренко хальмгин болн Әрәсән спортын йоста ик одн болжана. Художественн гимнастикин секцд дөрвн настадан ирж. Тренер Людмила Гальченко багд орв. Тер цагас авн өдр болһн көлсән асхад дасхл кедг болв, хот-хоолан кемжәлв, олн-зүсн марһаст орлцдг болв. Алина Әрәсән болн нарта-делкән марһанд кесг дәкж диилвр бәрсн билә. Эн спортар көдлжәх күүкд ке-сәәхн хувц өмсж, олн-зүсн күнд элемент кеж чадан гиж әмтн тоолна. Иим кевәр эдниг зуг сцен деер үзж болх. Болв марһанд ямаран күнд белдврин кедгин тускар олн улс меддго болх. Хойр минһн доладгч жиләс авн Алина Макаренко Әрәсән хамцу командын ханьд оржана. Энүнә келсәр, эннь ик дааврта керг, ик көдлмш кех кергтә болна. Өрүн эртсә авн асхн ора күртл дасхл кенә. Зәрмдән шавтаһан көдлх кергтә болна. Алина келсәр, нурһнь одахн экләд өвддг болв. Тер бийнь тренерин өгсн даалһвр күцәв. Спорт хайхин туск шиидвр энүнә тренерт болн өөрхн улстнь өвәрц болсн уга.

Олимпийск чемпионк Алина Макаренко келсәр, кесг дәкж шав авч. Ода эмнүлһ авчана. Өвдг деер кесг шав бәәнә.

Әрәсән хамцу командын ханьд орснас авн тавн жилин эргцд Алина Макаренко хойр минһн арвдгч жилд Сингапурт уйн наста спортсменмүдин наадна дииләч болв, хойр минһн арвн негдгч жилд нарта-делкән чемпионкин нер зүүв. Хойр минһн арвн хойрдгч жилд Лондон балһснд олимпийск чемпионк болв. Энүнә келсәр, ухалж тоолжасн цуг күцәмж бәрв, ода һундл угаһар спортан хайжана. Иргчдән Алина тренер болж көдлх зурата.

Алина Макаренкон келсәр, тренер Гальченкод бичкдүдлә дасхл кехд нөкд болх саната. Хальмгт художественн гимнастик делгрүлх кергтә. Зуг кергтә таал уга. Региона правительств дөн болх зөвтә. Ода кевс, помост уга, сән зал чигн уга.

Сүл цагт художественн гимнастик мана танһчд делгрлт авчана. Тер бийнь гимнасткс бәәцин таал уга хораст көдлнә, кергтә оборудвань уга. Тегәд бичкн багар хувагдад дасхл кех кергтә болна. Зәрмдән бичкдүдин садмудын болн талдан чигн учрежедньст дасхл кех кергтә болна. Тер бийнь Алина Хальмг танһчд ирж көдлх саната.

Художественн гимнастикин тренер Людмила Гальченко келсәр, Ода Алинад олн һазрас көдлх селвг ирв. Һазадун ордудт болн Московск областьд көдлх селвг бәәнә. Иим специалист керглгджәнә. Танһчд нөкд болх гиж күләжәсн уга. Эннь өвәрц болв.

Түрүн авгтан Алина Макаренко МВД-н спортивн комплекст пүрвә өдрәс авн бембә өдр күртл мастер-классуд өгх.

Баира Петрова, Максим Мятежный