201З-гч жиләс авн Хальмг танһчин олн-әмтн цевр электрокүчәр теткгддг болхмн
201З-гч жиләс авн Хальмг танһчин олн-әмтн цевр электрокүчәр теткгддг болхмн. Хойр жил хооран тосхгдсн салькар электоркүч орулдг систем һурвн сар хооран эдлврт орулгдсн бәәнә. Өдгә цагт специалистнр профилактическ кекрг-үүлдврән төгсәжәнә. Компаня һардачнрин темдглсәр цуг тоот көдлмшт орулгдхдан белн бәәнә.
Мана үүдәгч баг салькар күч орулдг системс зогсчах бәәрнд ирсн цагт Калмэнергоком негдлтин һардач Дмитрий Кирмелашвили болн спкециалистнр энд бәәж. Эн акционерн ниицән "Фалкон Капитал" нертә ик компаня нег әнгнь болжана. Дигтә эн компань мана танһчин һазрт цевр электрокүч оруллһна өргн төсв күцәжәнә. Дмитрий Кирмелашвили келсәр, өдгә цагт негдлтин специалистнр цуг көдлмшиг диглж күцәжәнә. Хамгин өөднән кемжәнд ода көдлмш күцәгджәх болжана. Салькар күч орулдг систем сүл һурвн сарин эргцт көдләд, тавн зун часин эргцт нег сай киловаттэнергокүч танһчар орулсмн. Ода болхла, профилактическ эв-арһ күцәх кергтә.
Өдгә цагт бидн киитрүлдг системинь хәләһәд, күч орулдг наадк цуг эв-арсинь хәввдн. Цугтан дигтә-даратаһар күцәгджәнә. Хойрдгч станцнь бас белн манһдур-нөкәдүрәс эдлврт орулгдхмн гиж негдлтин һардач келнә.
Келхд, энд көдлжәх компаня специалистнр цуһар сурһульд орад, шишлнг белдвр авсмн. Дәкәд болхла эднә көдлмшиг Германя һазрт бәәх һоллгч компаня специалистнр интернетар дамжад шинжлж хәләдг болжана. Тедн мана күцәжәх цуг тоотын бүрткж, эндү һарсн цагт чиклж дөнг-нөкдән күргнә гиж Дмитрий Кирмелашвили цааранднь цәәлһж келнә.
Мөнгән орулжах инвестормуд энд дор ормднь сервисн цутхлнг тосһх зурата. Болв энүнә тускар келхд ода деерән эрт. Юнгад гихлә, салькар күч орулдг дәкәд 11 шин станц босһх кергтә. Ода деерән тер то станцсин Копенгагенас Әрәсәһүр авч ирх төр хәләгджәнә. Хальмгт болхла, хату девскртә хаалһ тосхлһна болн шишлнг бәәр белдлһнә көдлмш күцәгджәнә. Эн тоот көдлмш күцәлһнд федеральн бюджетас мөнгн ирсн бәәнә. Мана хальмг теегт иим кевәр электрокүч орулдг ик парк бүрдәх күсл даалһвр Әрәсән орн-нутг авсн бәәнә. Өдгә цагт көдлмш сән йовудта болжана гиж негдлин һардач тоолжана.
Инвестормудин иткүлсәр шин жилин эклцәр январь сард цевр электрокүч оруллһна системс, Хальмгин әмтиг электрокүчәр экләд теткхмн. 201З-гч жилд эн төр бүклдән хаһлгдх зөвтә.
Хальмг танһчиг цевр электрокүчәр тетклһнә ик төсв ахр цагин эргцд бәәдл-жирһлд тохрагдхин тускар танһчин толһач Алексей Орлов чигн күүндвртән темдглсн билә. Эн төсвиг күцәх арһ-чидл маднд бәәнә гиж танһчин толһач иткүлв.
Чүүчән Валентина, Очра Сергей
