Бүртклһнә ведомствин көдләчнр ниилмж уга өрк-бүлмүдәр йовад рейд давулв

Насни дигд күрәд уга бичкдүдлә көдлдг комиссин болн талдан бүртклһнә ведомствин көдләчнр ниилмж уга өрк-бүлмүдәр йовад дарани рейд давулв. Әрк-чаһр уудг, күүкдән мууһар хәләдг эк-эцкнрин, зөв-йос эвддг бичкдүдин то жил ирвәс икдәд йовна. Элст балһснд тиим далн һурвн өрк-бүл, тер тоод 112 бичкдүд шишлнг тоот авгдсн бәәнә. Деер заагдсн церглтсин көдләчнр хойр долан хонг болһн им өрк-бүлмүдәр йовж бүртклһ кенә. Кемржән бүртклһнә йовудт зөв-йос эвдсн йовдл харһхла, эк-эцкнь урдк кевәр сокту болхла эднә бичкдүдиг эднәс салһж шишлнг учрежденьд орулх зөв эднд бәәдг болжана. Рейдин йовудт урднь әрк-чаһр икәр уудг өрк-бүлмүд шинәс бүртклһнд орв. Зәрм өрк-бүлмүд чик халһдан оржахинь специалистнр темдглжәнә. Әркән хаяд, эврә үрдүдтән оньгад тусхаһад үүлдг болв. Эннь мадниг байрлулжана. Юнгад гихлә, күүкд-көвүд эрк биш эврә өрк-бүлдән өсх зөвтә гиж специалистнр тоолжана. Тегәд иим бүртклһнә йовудын, цәәлһврин көдлмшин ашт балһснт эн халхин көдлмш ясржана гиж темдглх кергтә.