Орс келнә болн литературин багшнр сурһулин курс давжана
Эрдм-сурһулин көдләчнрин мергжлт өөдлүллһнә институтын ул деер эн өдрмүдт орс келнә болн литературин багшнрин төлә «Обучение в контексте новых федеральных государственных образовательных стандартов» нерәдлһтә сурһулин курс давжана.
Курсин һол күслнь — хальмгин багшнрт шин неквр олзлж көдллһнә бүрдәмжднь дөнг боллһн болжана. Энүнә кергт Әрәсән хотл Москва балһснас багшнр, номтнр дамшлтарн хувалцхар ирсмн. Мергжлт өөдлүлһнә Москван академин орс келнә болн литературин кафедрин доцент Татьяна Емельянова курст оржах багшнриг өдгә цагт олзлгджах , дәкәд болхла шин интерактивн эв-арһсла өөрхн таньлдулв. Эн цага багшнр эврә көдлмштән эрк биш өдгә цага эв-арһ олзлх зөвтә гиж Татьяна Емельянова тоолжана.
201З-2015-гч жилмүдт мана орн-нутгт дундын школын сурһульд шин эв-арһ орулгдхмн. Урдк жилмүдлә дунгцүлхлә, шин эв-арһ школын бәәдл-жирһлд, багшнрин болн сурһульчнрин хоорндк хәрлцәнд сольвр орулхмн. Энүнәс иштә эк-эцкнрин болн школын хоорндк хәрлцән бас батрхмн.-гиж Москва балһсна номт темдглв.
Мергжлт өөдлүллһнә институтин ул деер давжах курст мана танһчин школмудин жир һар багшнр орлцжана. Теднә тоод Светлана Абильхаирова. Эн багш Воронеж балһсна багшин институт төгсәснә хөөн хөр һар жилдән Яшкулин района Утта селәнә дундын школд көдлж йовна. Эн багшин тоолврар иим курс бүрдәсн сән йовдл. Багшнрт ик дөнг болсн деерән шин тоотла таньлдх арһ өгнә гиж багш келнә. Дәкәд болхла им курсин йовудт багшнр дамшлтан өөдлүлсн деерән талдан багшнрла харһад сүв-селвгәрн хувалцна.
Гиляна Убушаева болхла, орс келнд болн литературт дурта болсндан багшин эрдм шүүж авсмн. Эн курс нанд бичкдүдлә көдлсн цагтан шин эв-арһ олзлх арһ өгчәнә, юнгад гихлә цуг сән тоотыг бичкдүд дигтә школд сурчасн цагтан толж авдг болжана , дәкәд болхла иргчдән дасх эрдмән шүүж авлһнд багшнр бас ниилчән күргнә гиж Гилянв Убушаева келнә.
Эндр багшнр «Разработка тематического планирования» гидг төрәр лекц сонсв. Курсин сурһуль эн долан хонгин чилгч күртл болхмн. Энүнә йовудт орс келнә болн литературин багшнр професииональн дамшлтан өөдлүлж өдгә цагин кесг шин эв-арсла таньлдхмн.
Ээнән Дельгр, Ирчинә Алексей
