Өмн үзгин федеральн округин дииләчнр йилһрв

Хальмг танһчд арвн-арвн һурвн наста бичкдүд дунд картаэн Өмн үзгин федеральн округин марһана дииләчнр йилһрв. Дөрлдән спортын мастер, хальмгин каратэн федерацин ах зарһч Станислав Орашевин санлд нерәдгдв.

Күцлдән эрк биш күрдг, әмтнд дөн күргдг, оньдин түрүн ормд йовдг. Иим кевәр Станислав Орашев эврәннь тренерин санлд үлдв. эврәннь сурһульч Виталий Скляров кесгтән келж чадх. Сурһульчнь эврәнь багшан давж һарв. Эннь дигтә иим йовдл болж һарчана. Көтчнрә селәнд каратэн секцд Станислав бичкн цагтан ирж. Чидлән нөлго көдләд, спортын масетрин цол зүүв. Хальмгин каратэн федерацин ах зарһч болв.

Хальмгин каратэн федерацин ах тренер Виталий Скляровин келсәр, Хальмгин каратэн федерац билгтә бөк Станислав Орашевиг геев. Эн күн сән бүрдәһәч билә. Спортын халхар сән күцәмж бәрв. Спортын мастерин цол зүүв.

Марһанд тренер Виталий Скляров арвн хойр сурһульчан үзүлв. Эдн цугтан Көтчнр селәнд каратэн секцд оржана. Тенд Станислав түрүн ишкдлән кесмн. Орашевин өррхн элгн-саднь — экнь, дү күүкнь болн талдан чигн элгн садн марһана бүрдәһәчнрт ханлтан өргхәр ирв, спортсменмүдиг дөннв.

Станислав Орашевин наһц эгч Тамара Сагипован келсәр, Станислав оньдин спортын мастерин цол зүүх саната билә. Марһанд олн бөкнр ирж орлцснд ик ханлтан өргжәнә. Дөрлдән сән бүрдәмжтәһәр давулгдв.

Марһана ах зарһч Алексей Блинков дөрлдәнә сән бүрдәмжин тускар клев. Москвһас ирсн гиич хальмгт түрүн болж иржәнә. Элст балһснд болсн Өмн үзгин федеральн округин марһан ик чинртә болв гиж эн темдглв. Жил ирвәс уйн наста спортсменмүдин мергжлт өөдләд йовна гиж гиич келнә. Эннь тренермулын байн дамшлтын нилч болжана. Тер мет каратэн марһа бүрдәж давулһна ик дамшлт хоршагдв. Иим дөрлдәнд уйн наста каратистнр кергтә дамшлт хоршана, талдан дамшлтта бөкнрәс үлүгүр авчана.

Марһана ах зарһч, Әрәсән каратэн федерацин зарһчнрин комитетин гешүн Алексей Блинковин келсәр, марһана дииләчнр Әрәсән марһанд орлцх зөв авх. Иим зөв авхин төлә олн бөкнр сән белдвр үзүлжәнә. Хальмгин спортсменмүд сән дамшлт хоршасн үзүлв.

Улан Манджиев каратэн иим марһанд кесг дәкж орлцжана. Болв эндр диилвр бәрж чадсн. Әәдрхн балһсна спортсменд шүүгдәд, күрл мөнгн медаль шүүж авч чадсн уга. Тер бийнь Улан һунджахш. Зәрмдән шүүгдәд, эврәннь дуту-дундсан чиклх арһ учрна. Ростов на Дону балһсна команд хамгин олн. Эднә келсәр, диилвр бәрхд күнд болх. талдан бөкнр сән белдвр кеж.

Эн көвүнә келсәр, зарһчнр йир сәәнәр көдлв. Хальмгин хотл балһснд гиичнрт таасгдв.

Дөрлдәнә йовудт хамгин ке-сәәхн марюан командн кумите гиж нерәдгднә. Энүнд регион болһн эврәннь хамгин сән бөкнриг элчлнә. Энүнд чиннүрин катгорь тоод авгдхш. Зәрмдән гиигн бөкнр талдан күнд чиннүрин спортсменмүдиг диилдг билә. Аштнь хальмг танһчин команд түрүн орм эзләд, алтн медаляр ачлгдв. Волжский балһсна команд хойрдгч орм эзлв, күрл мөнгн медаль Ростов на Дону балһсна команж шүүж авв. Станислав Орашевин санлын марһаг жил болһн бүрдәх шиидвр авгдв.

Батан Санжирма, Очра Сергей