Никита Санджиевин ончта өөнин байр Ик Чонс селәнд болв
Хальмг танһчин түрүн скульптор Никита Санджиевин йирн жилин өөнд нерәдгдсн байрин керг-үүлдврмүд цаарандан болжана. Энүнә программар байр энүнә төрскн селәнд Целинн района Ик Чонс селәнд болв.
Күндтә гиичнриг, тер тоод бичәчнриг, зурачнриг, скульптормудыг, Никита Санджиевин көвүн болн күүкинь тогтсн авьясар селәнә өөр цаһар хадг татад, халун жомбаһар тооһад тосв. Бәәрн хурлд нертә скульпторин санлд нерәдгдсн мөргүл болв. Никита Санджиевин өөнд нерәдгдсн байр селәнә школд болв. Сурһульчнр эврәннь зургудын болн нәәрүлж бичлһнә көдлмштә тематическ экспозиц белдв. Тер мет энд Пальмовин нертә келн-улсин музейин һәәхүл көдлмшән эклв. Энүнд төрскн һазртан нерәдгдсн скульпторин көдлмш үзж болх. Тер тоод Бор-Нуурин күүкн нертә зург хәләж болх. Танһчин нертә үүдләч эн зургыг Вера Кодлаевас зурсн бәәж.
Вера Кодлаеван келсәр, долан наста күүкиг чемодан деер суулһчкад, зург зурв. Эннь йоста илвтә керг болж медгдв. Иим кевәр Никита Амолданович Ик Чонса һазран мөнкрүлв.
Байрин йовудт скуьлпторин тускар олн бүлән үгмүд келгдв. Школд болсн байрт сурһульчнр, Никита Санджиевин үүдәлтд дурта улс, энүнә элгн-саднь орлцв. Тер мет селәнд танһчин нертә эрдмин үүлдәчнр, зурачнр ирв. Эднә зәрмн Никита Санджиевла хамдан көдлж йовсмн.
Хальмгин алдр скульторин санл мөнкрүлхин тускар бәәрн селәнә улс района һардврт болн Элстин мэрийд седвәр орулж өгв. Энүнә эскизнь ода белн болв. Энүнә зокьялчнь Әрәсән ачта зурач Владимир Васькин. Никита Санджиевин бәрмл көшә удл уга селәнд тәвгдх.
Целинн района администрацин толһач Виктор Джанджиевин келсәр, өөнин керг-үүлдврмүд олн-зүсн халхар болжана. Энд кесг һәәхлмүд бүрдәгдв, келн-улсин музйе һәәхүлән авч ирв. Зәрм һәәхлмүд Никита Санджиевин үүдәлтд бүклдән нерәдгджәнә. Эн көдлмшт баһчудыг олар орулх санан бәәнә. района талдан школмудас бичкдүд ирәд, һәәхүл хәләв.
Зурачин ончта өөнлә ирлцүлж Искусство предков постиная нертә танючин марһана дииләчнриг ачлв. Школын сурһульчнр тәвн көдлмш марһанд белдж. Цуг көдлмшиг жюри һурвн номинацар үнлв. Эннь дүрлсгч болн урн һарин эрдмин болн сурһульчнрин үүдәгч нәәрүлж бичлһнә көдлмшин номинац. Дииләчнр болн призермуд дунд Ик Чонс селәнә бичкдүд йовна. Эдн эврәннь төрскн һазрин алдвр үүлдәчин үйнр гиж бийән тоолжана. Марһана дииләчнриг ачлх мөрәг селәнә болн района администрац болн онц улс белдж. Тер тоод Никита Санджиевин күүкднь бас эн көдлмшт орлцв. Бәәрн селәнд уйн наста зурачнрла иим харһлт сән авьяст тохрах кергтә гиж шиидгдв.
Вера Санджиеван келсәр, төрскн һазртан ик кезәнәс авн ирәд уга бәәж. Соньн болн бүлән харһлт болв. Эдниг бүләнәр тосж авв. Гертән бәәснлә әдл болж медгдв. Ик Чонс селән хойрдгч гер гиж сангдна. Бичкдүд тосж авла, хурлд мөргүл болв. Школд Никита Санджиевин музей бәәнә. Бәәрн школын багшнр эднлә өөрхн залһлда бәрж нөкцлт күцәх саната.
Никита Санджиевин йирн жилин өөнин байр мана танһчд эн жилин туршарт бүрдәж давулгдх гиж байрин йовудт келгдв.
Туутша Наталья, Эрнжәнә Эрднь
