Әәдрхн-Кизляр төмр хаалһин тосхачнр санлын поездар йовв

Төрскән харсгч дәәнә цагт Әәдрхн-Кизляр хоорнд төмр хаалһ тосхсн Хальмг танһчин улсин баатр-зөрмг йовдлын далн жилин өөнд нерәдгдсн байрин керг-үүлдврмүд Әәдрхн балһснд болв. Энүнд Лаганск, Хар Һазра, Үстин болн Яшкульск района дәәнә цагт эн төмр хаалһ тосхсн ветеранмуд орлцв. Тер мет делегацин ханьд Элстин һучн ветеранмуд Әәдрхн одв. Санлын поездин толһад Советин йосна цагин паровоз йовв.

Артезиан болн улан Хол станцст ммеморилаьн самбрмуд секгдв, Улан Хол поселкин баатрмудын аллейд болхла, санлын чолу тәвлһнә үүлдвр күцәгдв. Улан тугмудар болн цецгүдәр кеерүлгдсн паровозин ут чашкур дәәнә цагт күнд тосхлт кесг улсин санлын сергәв. Иим паровзин ә соннсн талдан әмтн болхла чидлән нөөлго төмр хаалһ бәрсн әмтн седклдән ик ханлтан өргәд, күндлв.

Әәдрхн балһсна төмр хаалһсин станцд ветеранмудын олн әмтн болн оркестр көгжмәр байртаһар тосв. Иньглтин концертдболхла, Хальмгин болн Астраханск областин артистнр орлцв.Хальмг танһчин правительствин нерн деерәс төмр хаалһин nосхачнрин танһчин премьер-министр Людмила Иванова болн Астраханск областин вице-губернатор Консантин Маркелов йөрәлин үг келв. Дәәнә күнд цагт төмр хаалһ тохсн улсин күч көлснөдгә цагт чигн чинрән геежәхш. Эндр өдрт чигн Әәдрхн Кизляр хоорндк төмр хаалһ Әрәсән хамгин ик чинртә замин негн болжана.

Нимгрә Валентина, Бадмаран Владислав