Раздорская станицд хальмгин салдснрин санл әүрн кевәр хадһлгджана
Хальмг танһчин хәәврин отряд Ростовск областьд һарч йовв. Раздорск һатлврин далн жилин өөнин байрт эдн орлцв. Нег минһн йисн зун дөчн хойрдгч жилин зунар һатлвриг харслһна дәәлдәнд зун арвдгч салу Хальмгин мөрнә цергин дивизь орлцсн билә. Энд болсн сүркә дәәлдәнд Советск Союзин Герой Эрдни Деликов баатр-зөрмг кевәр хортнла ноолдсмн.
Энд далн жил хооран дегд сүркә дәәлдән болсмн. Ода болхла тер цагин тускар үлдл чигн үлдсн уга. Төрскән харсгч дәәнә цагт Советск Союзин церг хооран цухрж йовад, тедниг күләжәсн немшин церглә ноолдв. Эн саамд зун арвдгч салу Хальмгин мөрнә цергин дивизин дәәчнр немшин танкин бүкл дивизлә дәәлдсмн. Мана салдснриг деерәс самолетмуд дөннсн уга. Тер бийнь баатр-зөрмг хальмгин дәәчнр цус-махан асхад, хортиг зогсав.
Багш Андрей Сердюковин келсәр, хальмгин дивизь олн дәәчнрән геесн бийнь, дөчн һурвдгч жил күртл дәәнд орлцв. Тенг һолын көвәд болсн дивизин баатр-зөрмг дәәлдәнә туск санл ода күртл әрүн кевәр хадһлгджана. Раздорск дундын школын багш Андрей Сердюковин келсәр, төрскән харсад әмнәсн хаһцсн улсин нег һазра улсла болн дәәчнрин үйнрлә Тенгин һазрт болсн харһлт өдгә цагин дән-дажг уга цагт давсн туужиг дәкнәс сергәж өглһн болжана.
Багш Андрей Сердюковин келсәр, хальмгудын баатр-зөрмг дәәлдәг мана улс мартшго. Энд бәәсн әмтн Эрдни Деликовиг болн энүнлә дәәлдж йовсн салдснриг йир сәәнәр меднә. Хальмг болн орс келн-улсиг иим баатрмуд негдүлнә.
Алдр Тенг һолын көвәд Эрдни Деликовин баатр йовдлыг хальмг улсин туужла залһж тодлна. Зөрмг, йоста дәәч гиж эн баһ наста көвүг энд тодлж күндлнә. Бичәч Анатолий Калинин дәәнә цуг жилмүдт корреспондент болж көдлсмн. Ода энүнә герт Сарпинск района Салын Тугтн поселкин делегациг өөрхн элг-садн гиж тосна. Цииһн Будулай болн Эрдни Деликовин харһлт бичәч Калинин үүдәсн Цииһн нертә романд орсмн. Бичәч Андрей Калинина күүкнь Наталья келсәр. Тенгин хазгудын тавдгч корпуст олн келн-улсин элчнр дәәлдж йовла, тер тоод хальмгуд бас бәәсмн. Хальмгуд йир сән дәәчнр болн разведчикүд болж дәәлдлә. Хамдан дәәлдж йовсн дәәчнрләһән йовж йовсн цагт хальмгудын тускар Будулай бас тодлв.
Эрдни Деликов арвн йисн настадан әмнәсн хаһцв. Деликовин ах Очрин күүкнь Евдокия Деликова жил болһн Тенг һолд ирәд, энүнә авһнь баатр-зөрмг кевәр дәәлдсн һазриг эврәннь нүдәрн үзнә, Эрдни Деликовла хамдан дәәлдж йовсн улсла харһад күүнднә. дәәнә цагас үлдсн окоп деер хальмг улсин хуучн авьясар хальмг һазрас авч ирсн һазр цацна.
Эрдни Деликовин ач күүкн Евдокия келсәр, цуг энд бәәх улсин теврәд үмсх дурн күрнә, мана авһин санл тодлжах улст ик ханлт өргжәнәв.
Раздорская станицд болн энүнлә хам-хоша бәәх Пухляковская күүтрт дө ордгч июль сард болсн дәәлдәнә туск санлын һазр дала. Эрдни Деликовин болн хальмгин зун арвдгч салу мөрнә дивизин баатр-зөрмг йовдлыг чолунд мөнкинд бичв. Онц келхд, Элст балһснд иим туужлгч һазр уга. Тегәд чигн Тенгин һазр маднд йир тааста гиж салдс-баатрмудын нег һазра улс келнә. Нааран ирәд, хальмгудын дәәчнрин санл тодлх һазр энд бәәнә.
Татьяна Дмитриева, Хулхачин Николай
