Үстин района көгшә ода күртл дурта эрдмән мартжахш

Хальмгин телеүзүлврин дөчн тавн жилин өөнд нерәдж Вести Калмыкия программд өдр болһн Бийән тань нертә рубрик һардг билә. Эн цагин эргцд мана телеэкранд олн-зүсн эрдмтә әмтн хуучн зургуд үзәд бийән таньсмн. Мана үүдәгч баг иим нег күүнлә харһад таньлдв. Эльза Бадаева нер туурсн домбрин оркестрт орлцад, билг-эрдмән үзүлж йовсмн.

Эльза Картаевна Бадаева Үстин района нер туурсн домбрин оркестрин түрүн орлцач. Энүнә келсәр, тер цагт Элст балһснд иим оркестр уга билә. Тиигхд Эльза Картаевна бичкдүдин садт көдлжәсмн. Асхн болһн көдлмшин хөөн бәәрн клубд дурта домбран цокхар гарма татхар адһдг бәәсмн. Ода күртл дурта эрдмән хаяд уга.

Эн хуучн зургуд гостелерадиокомпаня архивд үлдсн бәәж. Тер цагт домбрин оркестр Шарка-Барка, Өрүни һарсн нарн, Әәт майор дуд дуулад, Москва балһснд болсн селәнә художествен коллективмудын цугәрәсән марһана лауреатын нер зүүсмн. Хальмгин артистнр Москван кабельн заводын көдләчнрт, офицермудын герт, Чайковскийн нертә концертн залд билг-эрдмән үзүлв. Товчлгч концерт болхла сьездмудын Кремлевск бәәшнгд болв. Тер цагт түрүн орм эзлсн коллективд тавн зун арслнг мөрә өглә. Тер сергмжтә цагиг ода күртл сәәнәр тодлж, седклнь байрлна.

Эльза Картаевна бичкн цагасн авн дуулхдан, домбр цокхдан дурта бәәсмн. Энүнә келсәр, өрк-бүлднь цугтан домбр көгжмд дурта бәәж. Ода байн үүдәгч дамшлтан эврәннь үрдүдтән өгхәр шунжана. Эльза Бадева хөвтә күн бәәж. Ода зурһан үрән өскәд кү кев, арвн зурһан ачнр-зеенртә, арвн тавн жиж-зеенчртә. Йирн нас зүүсн бийнь, ода чигн чанһ чиирг, заглюн.

Дала нас зүүсн бийнь, Эльза Картаевна гертә хара сууж чадхш. Олн-зүсн үүдәгч марһаст ода күртл орлцна. Өрк-бүл байрин өдрмүдт цуглрхла, хальмг ду дуулад, домбр цокад, өөрхн улсиннь чееж сергәнә.

Ээнән Делгр, Очра Сергей