Садв гемлә ноолда кехин төлә Әрәсән правительств дөнцл мөнг мана танһчд йилһж өгв
Садв гемлә ноолда кехин төлә Әрәсән правительств Хальмг танһчд һучн һурвн сай һурвн зун нәәмн арслнг йилһж өгв. Энүнә тускар эндр танһчин эрүл-менд харлһна болн социальн делгрлтин министерств зәнглв. Иим мөнг йилһж өгхин тускар Әрәсән премьер-министр Дмитрий Медведев ирлцнһү заквр батлж авв. Танһчин эрүл-менд харлһна министерствин бөдүн улст медицинск дөн күрглһнә әнгин ахлач Елена Ользееван келсәр, йилһж өгсн мөнгн садв егмәс гетлүлһнә юолн эн әәмшгтә гем эмнүлһнә төлә олзлгдх. Ода танһчин министерств йилһж өгс мөнг райодар хуважана. Дәкәд нег тодлад келхлә, Дмитрйи Медвдедин закврар, хөрн тавн регионд нег жува арслнг йилһж өггдв. Тер тоод Хальмг танһч орв. Эндр өдрт мана танһчд садв гемәр гемтсн улсин то өсжәнә. Нидн жил хойр зун тәвн дөрвн күн әәмшгтә гемәр гемтж, эднәс һучн хойр бичкдүд.
Давсн жилд хойр зун тәвн дөрвн күн садв гемәр гемтв. Хойр минһн арвн негдгч жилд иим гемтә улсин то һучн хйор күүнд баһ билә. Эмчнрин тоолврар, мана танчһд иим то дегд ик болжана. Ах эмчин дарук, Хальмг танһчин внештатн фтизиатр Светлана Джанджиеван келсәр, иим күнд бәәдл тогтснь бас учрта. Сүл цагт олн әмтн холл һазрас гемтәд ирнә. Ик балһсдт одад көдлсн улс садв гемәр гемтәд ирнә. Эднәс хойр күн өнгрв.
Танһчин эмчнр жил болһн эн әәмшгтә гемәс саглулһна көдлмш күцәнә. Энүнә ашт һучн хойр бичкдүдт садв гемм илткгдв. Түргн кевәр гем илткдг аппарат зуг давсн жилд мана танһчд ирв. Садв гемин диспансерин эмч Альбина Каюкинован келсәр, хойр часин эргцд шинжлт белн болна. Шинжлт авсн хөөн компьютерин мониторт ашнь һарч ирнә.
Ода садв гемәр түрүн болж гемтсн улс противотуберкулезн диспансерин шин герт эмнүлгджәнә. Энүнд өдгә цагин некврлә ирлцәтә оборудоавнь углж тәвгдв. Тер тоод гематологическ, биохимическ болн иммуноферметн аппаратмуд бәәнә. Цуг кергтә эмиг гемтә улс өнгәр авчана. Садв гемин диспансерин әнгин медсестра Ольга Наминован келсәр, ода диспансерт далн күн эмнүлһ авчана. Иим гемм эмнүлх цуг кергтә эм бәәнә.
Роспотребнадзорин то-дигәр, мана танһчд садв гемтә улсин то жил ирәвс өсәд йовна. Дөнцл мөнг йилһж өгх регионмудын список тогтасн кемд олн-үзсн учр тоод авгдх. Роспотребнадзорин әнгин ахлач Сергей Савченко келсәр, садв гем хальдсн бичкдүдин то дөчн процент тогтажана, баһчудын то далн процентд күрчәнә. Хамгин икәр бөдүн улс садв гемәр гемтжәнә. Күн болһн хальдврта гемәр гемтх әәмшг бәәнә. Садв гем социальн гем болжана. Әмтнә бәәдл-жирһлин кемжән му болхла, иим улс садв гемәр гемтнә. Тер мет эн халхиг мөнгәр сәәнәр теткх кергтә болжана.
Федеральн шишлнг программар садв гемлә ноолда келһнә болн саглулһна төлә мана танһчд жил болһн кергтә эм болн оборудовань ирнә. Дөнцл мөнг авх регионмудын тоод Хальмг танһчд орхла, эннь мана танһчд сән дөн болхмн. Эрүл-менд харлһна министерствин әнгин ахлач Елена Ользееван келсәр, Лола поселкд гер-мал уга гемтә улсин төлә немр арвн орм секх зура бәәнә. Жирлһин күнд таалд харһсн улсиг эмнүлх арһ учрхмн.
Тер бийнь эн төр хурц төрт хүврв. Хальмг танһчин күн болһн садв гемәр гемтх әәмшг бәәнә. Дөнцл мөнг йилһж өгсн кемд федеарльн ведомств мана танһчин садв гемәр тогтсн күнд бәәдл тоод авад, дөнцл мөнг йилһж өгх гиж нәәлжәнәвидн.
Арстана Светлана, Колдан Церн
