Үстин района цутхлнг больницд капитальн ясвр төгсв
Үстин района цутхлнг больницд дегц кесг әнгст капитальн ясвр төгсв. Энүнә төлә хөрн хойр сай арслнг йилһж өггдв. Эрүл-мендин халх шинрүлһнә программар өдгәц агин некврлә ирлцәтә шин оборудовань хулдж авгдв. Района эмнүлин учреждень хаалһар әәмшг уга йовлһна федеральн программд орсмн.
Хөрн хойр сай арслнг. Иим мөнг федеральн бюджетас эмнүлин учрежденьд ясвр кехин төлә йилһж өгв. Ода больницин әнгст у-сарул, цевр-цер болв. Болв хамгин һол кергнь — ода көдлхд эвтә болв гиж эмчнр келнә. Хуучн терзмүдин ормд шин пластикин терз углж тәвгдв. Тер мет пол, үүд, ораһинь сольв, турвас шинрүлв, шин сигнализац углж тәвж. Гемтә улст эмнүлин цуг таал бүрдәгдв. Эрүл-менд халх шинрүлһнә программар тавсн сай арслнга шин оборудовань хулдж авгдв. Төрлһнә әнгин төлә тавн медицинск техник ирв. Тер тоод интенсивн терапийн инкубатор, УЗИ аппарат, кювез, нилх дулалһна аппарат, талдан чигн кергтә техник бәәнә.
Үстин района цутхлнг больницин ах медсестран үүл даажах Людмила Кирилаеван келсәр, ода көдлхд сән таал бәәнә. Урднь иим кергтә оборудовань уга бәәсмн. Нилхиг зуг арһ-чидләрн хәләж авдг биләвидн. Ода болхла аппарат бәәнә. Энүнә дөнгәр бөдүн улсин болн бичкдүдин эрүл-менд бүрткнәвидн.
Ах медсестран үүл даажах Людмила Кирилаеван келсәр, иим оборудованя дөнгәр зүркнә, ки авлһна, цуцна бәәдл, гемтә улсин халуһинь бүрткж хәл.ж болх. Америкд кеж һарһсн искусственн кевәр өөшкд ки өглһнә аппарат хамгин бичкн улсин төлә хулдж авгдв. Специалистнрин келсәр, тавн зун грамм нилхдыг хәләж харж авлһна төлә шишлнг аппаратур кергтә болжана. Урднь иим оборудовань селәнә больниц дуга билә. Жил ирвәс бичкн чиннүртә төрсн нилхдын то өсәд йовна. Шин оборудовань углж тәвгдв. Уд луга энүг олзлх саната.
Ах медсестран үүл даажах Людмила Кирилаеван келсәр, кемр нилх кииһән авдган уурхла, аппарат олзлад, шишлнг программар ки авхин төлә дөн болнавидн.Ода деерән иим аппарат олзлгдад уга. Иим оборудовань больницд эрк биш кергтә.
Темдглсн программар больницин герин нег әнгнь ясгдж шинрүлгдв. Эннь хирургическ, бичкдүдин әнгс, оперционн блок, төрлһнә гер болн бачм чинртә медицинск дөн күрглһнә церглтин гер. Цаһан Амна района больницин талдан әнгст бас ясвр кех кергтә. Эмчнрин келсәр, жил болһн эдн косметическ ясвр кенә. Болв гемтә улсин төлә медицинск сән чинртә дөн күргхин төлә таал бүрдәхлә сән болх. Хаалһар әәмшг угаһар йовлһна нертә эрүл-менд халх шинрүлһнә федеральн программар хөрн хойр сай арслнг йилһж өггдв. Эн мөнгәр кергтә ясвр кеж, шин оборудовань хулдж авад, селәнә улст медициснк дөн күрглһнә чинринь өөдлүлх кергтә.
Ээнән Делгр, Бадмаран Владислав
