Танһчин нертә номт Николай Кичапов ончта өөнән темдглжәнә
Эндр Хальмг танһчин ик дамшлтта аграрн халхин көдләч Николай Иванович Кичапов ончта өөнән темдглжәнә. Сталинградск областин Калинина нертә колхозд эгл көдләч болж экләд көдлв. Селәнә эдл-аухн институт төгсәснә хөөн Баһ Дөрвдә МТС-ин агроном болж көдлсмн. Ода күртл йирн нас зүүв чигн, көдлмшән хайжахн, номин халхар үүлджәнә. Николай Иванович номин кесг статья болн шинжлт бичв.
Йир нас зүүсн күүнә бәәдл-жирһлд юн багтж орх. Эннь бүкл нег үйин жирлһ болжана. Энүнд догшн дәәнә цаг, дәәнә хөөн үзсн зовлнг. Болв хамгин һол төрнь цуг кемд эврәннь төрскн һазрин төлә чидлән нөөлго көдлмш кех кергтә болв. Николай Иванович Кичапов иим үйнрин күн болжана. Сталинградск областин Терновка селәнд төрсн көвүн, дән эклхлә, эврә дурар дәәнд одв. Зун найн дөрвдгч дивизьд церглв. Калач-на-Дону балһсна өөр болсн түрүн дәәлдәг хамгин удандан тодлгдв. Сталинградск дәәлдәнә тал дунд болсн дәәлдән болв. Энүнә хөөн немшнриг төрскн һазрас экләд көөсмн.
Дәәнә хөөн селәнә эдл-аху халхар цаарандан көдлв. Цугсоюзн селәнә эдл-ахун институтд заочн сурһуль дасв. Энүнә ашт агрономин эрдмтә болв. Тәвн тавдчг жилд Баһ Дөрвдә МТС-ин ах агроном болж көдлв. Һурвн жил болад “Путь к коммунизму” нертә колхозин ахлач болв. Оджа энд Тундутово селән бәәнә. Жирдгч жилд Сарпинск услврин системин түрүн девснг эдвлрт орулсн кемд Николaй Кичапов эврәннь эдл-ахудан услврин һазрт малын хот белдж авдг болв. Колхозин баһ наста һардач бийдән болн талдан улст чигн чанһ неквртә бәәәсмн. Әмтнлә көдлж чаддг һардач эдл-ахун делгрлтин төлә ик тәвцән орулв. Тәвн жил хооран көдлж йовсн цагиг ода күртл сәәнәр тодлна.
Дәәнә болн күч-көлснә ветеран Николай Кичаповин келсәр, “Путь к коммунизму” колхозд экләд көдлсн кемд, эдл-аху му бәәдлд тусв. Хөд болн бод мал олн билә, техник бәәсмн. Зуг көдлмшән мууһар кедг билә. Тегәд бригадирмудыг болн талан чигн специалистыг сольх кергтә болв. Баһчуд урднь энүнә һардврт көдлжәлә. Эдн эдл-аху босж авв.
Энүнә хөөн партийн болн советск органмудт сән күцәмжтәһәр көдлв. Партин рацокмин сегләтрт сунһгдв, партин обкомин хойрдгч сегләтр күртл өсв. Хальмг танһчин Министрмүдин Хүүвин ахлачин дару кболж көдлсмн.
Күч-көлснә ветеран Иван Мантаевин келсәр, Николай Иванович Кичаповиг партийн көдлмшт көдлжәһәд таньдг болв. Селәнә эдл-аху халх йир сәәнәр меддг күн. Районд ирхлә оньдин цаһан седклтәһәр селвг өгдг билә. Шүрүн үг келлго, дуту-дундс зааж өгдг бәәсмн. Энүг селнә эдл-хаун профессор гиж нерәддг биләвидн. Урһмл болһниг сәәнәр меддг байн дамшлтта специалист гиж Кичаповин тускар келж болх.
Давсн зун жилин далдгч жилмүдт номин көдлмш күцәв, номин кандидатын цол харсв. Хальмг танһчин номин ачта үүлдәч гидг күндтә нер зүүв. Йирн наста ветеран ода күртл маши зална.
Йирн жилин туршарт иим кедү хаалһар йовсн болх. Йирн наста ветеран ола күртл ик зура зуралж күцәх күцл өмнән тәвжәнә. Өдгә цагт номт Николай Кичапов танһчин агропромышленн комплексин делгрлтин эврә программ бичжәнә.
Харлун Бадма, Максим Мятежный
